Chin Miphun Dirkamhtu CNA Camp Tlawnnak le Miphun Sin Siaherhnak

0

The Chinland Post| 2018 March 25| Ka ngakchiat lio in, CNA/CNF pawl he cun a chawnh zong chawnhbiak lo ding, ralkap an si caah Kawl ralkap nih theih ahcun tih a nung tuk, tiah bia vorh mi nih CNA cu pehtlaih lo ding, keimah he pehtlaihnak zeihmanh a ngei lo mi an si tiin ka lung aa hngat. Zeidah an si tite zong ka rak hngal hna lo. Ka rak tih hna. Asinain, hawi le sin in camp chung ah mucu siangngakchia an um tiah ka theih tikah, ka hawile ka sawm hna i kal ding in biakhiahnak ka ngei. Cupinah miphun caah nun thap in rian a tuanmi kan unau CNA an sining le an umnak hmunhma tiang phak ka duh ca zong ahhin a si.

Hakha in zing suimilam 9 in kan i thawh i Thangtlang – Sopum –Vanzang- Farrawn -Tlangpi le Tlanglo khua pal chih in Victoria camp cu zaanlei suimilam 3 ah kan phan. Kan tha a ba ngai sihmanhsehlaw,“ WELCOME TO VICTORIA CAMP CHINDLAND ” timi catar nih retheihnak a zorter dih. Gate hngaktu nih, mi zeidah nan si? Zei herh ti bantuk pawl a kan hal. Camp siangngakchia pawl a rak tlawng mi kan si kan ti i an ralbawi hna le pastor in lunglawmhnak hmaipanhnak he a kan don.

Zan suimilam 7 ah biaruahnak le mucu siangngakchia caah tiin ka ti khawh tawk ka kutput ka phorhmi hna peknak ka ngeih hna. Cu dih in, Ralbawi Pu Chawn Hmung Lian nih forhfialnak a kan chimh i, “ Kan nih CNA cu kan miphun he ti le nga bangin lengti mi si kan duh. Nannih cu ti nan si, kannih cu nga kan si. Nga cu ti loin an um khawh lo bantuk in kan nih cu nanmah bawmhchannak loin cun zeihmanh kan si lo,” a kan ti. Cu a bia nih, ka lung a ka suk. Khuaruahnak tampi a hun lut. Cucaah, zeitin dah an camp chung an ei din siseh, an thil puan aih tete herh bau mi an i sersiam ning, theih duhnak kha ka lung ah a hung chuak.

Ei le din, Facang hi khuate lei innkip bawmhalnak in an ngeih mi a si i meh le tihang hna cu mah tein an i tawlrel chom mi a si. Khua lei ah kumvui a that lo ah cun, an har hrim ko lai hi ta tiah lungsiarem lo in ka thawpi ka chuah. Cu thawhpi dah ti lo cun, ka tuah khawh mi um hlei hlah. Cutin tlawmpal ah, ka mithlam ah a hungcuang mi cu ngakchia tete kha an si. Ngakchia hi 150 hlei an si i an ei din le an sianginn kai ning zeidah an lawh hnga ka ti. Ngakchia cu, an pum tlamtling te in a thancho khawhnak ding caah ngandamnak he aa pehtlai in tampi ei awk an si. Asinain, an nih cu ei-tuktak muthai, cecek-gum hna hmanh camp lutchuak an um lawng ah a ngei mi an si ka hmuh tikah ka ngaihchia ngai.

Cun, fimcawnnak caah zeitin an cawnter hna ning ka hal hna tikah an chim mi bia nih ka lung a father hringhran. “ India ramri lei kan rak um lio ah India ralkap le Kawl ralkap nih a kan thuat tikah kan nupi kan fale he a kenkip in kan i then hna ruangah kan i dornak khua he aa naih bik mi ah kan nupi le fale kha khuasak ter asi i fimcawnnak lei zongah tha tein kan cawnter kho hna lo,” anti. Atu camp ah a um siangngakchia hi minung 11 an si i caan tling tein saya/mah an ngei lo. Sayamah pahnih an ngeih hna i volunteer bak in a hung tuan mi an si. Cu ka theih tikah, ka upat kho tuk hna. Zohchunh awktlak an si zia le miphun dawtnak lungput an ngeih hi bia le hmurka in a tlinh hnga lo. Hi bantuk an lungput hi ramkip um Chinmi zapi nih ngeih in ram le miphun caah mah le tuan khawhnak a lamkip in i tel kho hna usihlaw zeidah a lawh hnga ti zong ruahnak a hunk a pek.

Cun, a bik in ka sia a herh ngai mi pakhat cu; kan nih Chinmi tam-u cu Khrihfa kan si hna bantuk miphun caah rian a tuantu CNA zong hi khrihfa lawngte an si. Asinain, biaknak lei thazaang chuah duh ko zong ah Pastor an ngeih lo hnu cun an ca ah lam a um lo. Hihi, Chinmi khrihfa bu zong nih mission pakhat ah ruah in kum khat ah pastor pakhat cu chiahpiak awk an si.

Ka bia zong a hung sau pah cang caah biafunnak ah, hi ka phaknak nih ruahnak tampi le miphun le ram caah zeitluk in dah kan biapit timi hna tampi a ka hmuhter. A hlan i ka rak tih mi hna zong miphun le ram an dawtnak ka hmuh in upatnak in ka hmuh than khawh hna. Miphun caah ngeihchiah kaltak in le nunnak thap in rian a tuan mi an si i kan miphun dirhkamtu CNA hna zeitin dah rian an tuanning asi i zeitindah an i cawmning le an inntuarnak vialte hi mizapi nih theihpi le tuarpi a cu cang. Ka tonmi cu ka miphun nih aton ve bantuk in ka miphun nih aton micu kei zongnih ka ton ve, na ton ve. Kan ram caah tiin an nunnak tiang pek in ram adaw mi hna an dihlak cungah hi capar in upat nak ka pek hna.

Catialtu:
Sui Ly Par
30/10/2017
1:00 AM

About The Author

Na ruahning rak langhter ve.. (Leave a comment)

%d bloggers like this: