Chin Miphun Kong Senator Dean Smith Nih Nihin Parliament Ah A Chim Taktak Cang
Tawk Tling Thang | 2019 February 13| Chin ramkulh, Thantlang peng, Tikir khua tiang amah pumpak hrimhrim in a rak tlawngmi Australia Parliament in Senator Dean Smith nih nihin (February 13) ah tuahmi Australia Parliament ah Chin miphun le Chin ralzaam kong a chimphuan taktak cang tiah kan theih.
Senator Dean Smith hi 2018 January thla ah Chinram a rak tlawng. Hi liote hrimhrim in hin tutan Chinram ka tlawnnak i ka hmuhtonmi le nan temtuarmi vialte hi ka va kir lai i February thla ah tuah dingmi Australia Parliament ah ka va chimphuan lai tiah Laitlang a rak tlawn lio ah a rak chim cia cang. Cu bantukte in Chinram le Chin miphun dawtnak he nihin (February 13) ah tuahmi Australia Parliament ah a biakam bantuk te in a chimphuan taktak cang.
Hika ah Senator Dean Smith nih Australia Parliament ah bia a chim lio video zoh khawh a si.
“Tuni anmah Australia Parliament ah Senator Dean Smith nih Chin miphun le Chin ralzam kong a chimphuan taktak cang. Cu lawng si lo in Senator Dean Smith nih, February thla chung ah CHRO le Australia Chin Federation (ACF) he UNHCR zungpi ton biaruahnak kan ngeih rih hna lai a kan ti” tiah Pu Ceu Lian Mang nih February 13 zan ah The Chinland Post ah a chim.
2018 May thla lio ahkhan “Senator Dean Smith nih a chimmi cu, Chin miphun an bawmtu hna caah champion si kaa zuam lai i atu lio Chin miphun nih nan herh bikmi hna chung in…
(1) Australian Citizenship sawk/ pomnak kong
(2) Malaysia le India ummi Chin miphun kong le
(3) 202 visa in chungkhat auhnak kong hna hi Australia ram nawlngeitu hna sin ah dengteo tein chim kaa zuam lai. Australia um Chinmi a bawmtu hna Australian Parliamentarian Support Group zong ser le tuah khawh kaa zuam lai i Chin miphun ca i ka tuaktanmi vialte hi Chin Media Phu sin zong ah chim phuannak ka ngei te lai a kan ti” tiah Chin Charity Chairman Pu Renny Ceu Lian Mang nih The Chinland Post ah a rak chim.
Australia Chin Zatlang Bu (Australia Chin Federation-ACF) hruainak in 2018 December 3-4 ah Australia rampi Uktu Bawi Prime Minister, Minister a dangdang le cozah riantuantu, MPs le ramleng pehtliahnak tuanvo ngeitu hna cu Chin miphun ralzam kong le Chin miphun kong ah Chin Human Rights Organization (CHRO) riantuantu upa hna he tonbiaruahnak kan ngei.
Tutan hi, Senator Dean Smith tawlrelnak in CHRO nih a voihnihnak cozah an ton a si. Kan hnu 2017 September ah CHRO in Salai Bawi Lian Mang le Salai Za Uk Ling nih Australia cozah tonnak voikhat an rak ngei bal cang. Atutan hi a hleikhun in hlawhtlinnak cu cozah lubik le riantuantu tampi kan ton hna tiah kan theih.
2018 kum June thla lio ahkhan Australia ram in Senator Dean Smith nih Chinram le Chin ramkulh ah nuhrin covo a um lonak kong le nihin ni tiang Chin Ramkulh ah zalennak taktak a um lonak kong cu UNHCR zungpi, Geneva ah ca a kuat.
“UNHCR zung nih Chin ralzam pawl lam nan hunpiak nakhnga ding a biapi. A herh rih. An ram kir than ding ah thinphannak dirhmun a si rih tbk. amah pumpak hmuhmi kong le Chinram ah zalennak a um lonak kong a tialmi cu Senator Dean Smith nih Geneva ah a kuat” tiah Pu Renny Ceu Lian Mang nih cun a chimchap.
Australia hluttaw ah MP pakhat a simi Senator Dean Smith cu January 23 ah Hakha a phan i January 26 zan tiang a caam hnu January 27 ah Kalay ah a kir than. Chinram a caam chung ah Chief Minister Salai Lian Luai telh in Chinram cozah bu, hluttaw speaker Pu Zo Bawi, Hakha khuanu, khuapa, Chin zatlang bu, CNF, biaknak lei hruaitu upa, CCU riantuantu, Chin Media, siangngakchia bu, Hope Blood Donor Organization, ramkhel party le MP a tuan liomi palai pawl he ton biaruahnak an ngei kho.
Cun, Hakha sii-innpi, Hakhathar, Hakha Khuahlun a rawkralmi, HBA tualrawn velchum, Ralkap Tidil a rawkralmi, Khuacuanhnak tlang, Hlawhtling thlacamnak tlang, Solomon Van Hre inn, Thantlang CNF zung le Tikir Dam tibantuk hmun ah vehvatnak le tlonlennak a va ngei kho.
Senator Dean Smith hi Australia ram senator (hluttaw) lakah a hmasa bik Chinram a rak tlawngmi a si. Senator Dean Smith hi Australia ram ah senator (MP) 76 an um, cu lakah senator pakhat a si. Kawlram hi voili 4 a phan bal cang. Australia ram in cozah le senator vialte lakah 2018 January thla ahkhan a hmasa bik Chinram a rak tlawng. Hakha lawng hmanh si lo in Thantlang peng VP Henry Van Thio chuahkehnak Tikir khua tiang a va phan khomi Australia senator pakhat a si. Naypyidaw ah Vice President Henry Van Thio zong a va ton tiah kan theih.
Senator Dean Smith Laitlang a khuallam cu Australia ram ah khua a sami Australia Chin Federation Vice Chairman le Chin Charity in Chairman a tuan liomi Pu Renny Ceu Lian nih a rak zulh.
Senator Dean Smith cu Chinram a rak phak lio le Australia Day (National Day) aa ton caah Hakhathar nu upa hna he Van Hre Nunphung Hmuhsaknak inn ah Australia thantar thlirnak le Lai laam laampi nakin January 26 ah sunglawi ngai in caan an hmang. Australia Senator lakah a hmasa bik Chinram a phanmi lawng si lo in Australia cozah chung in Chinram ah a hmasa bik Australia Day a hmangmi senator pakhat zong a si.
About The Author
