Chin Miphun Lungrual Daihnak Zeitin Kan Ser Lai Timi Avoi (1) Ceihhmainak An Ngei
Chin Baptist Convention (CBC) hruainak tangin dirhmi Chin Shalom Mission (CSM) nih Chin miphun zeitin dah lungrualnak le daihnak kan serti khawh lai timi a voikhatnak ceihhmainak (Chin Peace Forum) cu CBC Hall, Falam ah 2019 January 17-18 tiang an tuah tiah theih a si.
Hi tonnak ah CBC upa dihlak, Chin National Front (CNF), Chin ram peng pakhat chung in Biaknak lei hruaitu, khuanu khuapa, mino bu le nubu hna sawm an si i minung (80) khual an phan kho tiah theih a si.
Hi puai tuahnak kong he pehtlai in CBC GS le CSM tuanvo ngeitu (Convener) Rev. Lawha Ling nih tutan kan tuah hnawh chan hi CNF le Mipi kar, pengkhat le pengkhat mizapi kar, ramkhel party le party, Biaknak lei le mizapi kar tbk Chin mizapi ca rian a tuanmi bu hruaitu hna sawm in miphun le ram thanchonak, lungrualnak, riantuantinak kongah zeitin dah lungrual te le daihnak he hmai kan fun khawh hnga timi lam hun kawlpiak hi kan itinhmi a si. Kanmah CSM nih hruaitu sinak le bu zong dirh in hmai kalpi kan itim lo. An iton khawhnak le an iceihhmai khawhnak lam lawng kan kawlmi a si tiah The Chinland Post ah a chim.
Tutan tonnak Chin Peace Forum ah Chin miphun hmunkip in siseh, miphun tengnge in siseh, holh in siseh kan idannak cungah itheihthiamnak, izumhnak, ihngalhpi in ilungrualnak lei ah Chin miphun kal a herhnak kong, Kawl ralkap le Rakhine AA an ikapnak cungah Chin miphun a simi paoh nih Chin ram chungin AA chuah awk nor ding, inntek mizapi duhning le hngalhhlangnak in rian a tuanmi Cozah si deuh hnga, Federal democracy kar kan hlannak ah zeitin dah Chin miphun dihlak nih kakip in kan idirmh khawh lai, Kan ramri, kan vawlei sungh lo in kan kilven cionak lai le hi bantuk tonnak hi CSM hruainak in caan ser than ding timi hna forhfialnak le ceihhmainak an ngeih tiah theih a si.
Hi tonnak ah Chin Ramkulh Cozah le Hluttaw tel dingin sawm an si nain State Counselor Daw Aung San Suh Kyi le VP Henry Van Thio tlun lai a si caah aho hmanh an ra kho lo tiah theih a si.
About The Author
