Chin Miphun Nan Caah Ka Dir Zungzal Ko: Senator Dean Smith
Chinland Post | 2022 February 14 – Western Australia (WA) in Senator Dean Smith nih Chin Miphun Ni biacah a chimmi, Laica in a tawinak kan hun tial than mi a si.
Senator Dean Smith hi Australia ah a ummi Chin miphun le community caah biatakte in a cawlcangh lawng silo in, Chin ramkulh ah siseh, Malaysia ah siseh, Chin miphun umnak ka dang ah kal in, Chin miphun kongkau ah fakpi in a kan dirpimi Chin miphun nih kan bochan mi Western Australia in Senator a tuan cuahmah lio mi a si. A tanglei ah, Chin Miphun nih kan sunhlawihmi Miphun Ni caah biacahnak a chimmi a si. A chimmi chung in a tlakning le a fiannak in lehmi (unofficial translation) a si. ~Editor
________________________________
Biachimmi: Keimah cu Senator Dean Smith ka si, Chin miphun le community he hawikomhnak ka ngeih mi a uang ngai mi ka si. Australia WA i ummi Chin miphun he kan i kawmh lawng silo in, Australia ramchung hmun kip ah ummi Chin miphun he hawikomhnak ka ngeih caah ka uang.
[WA ah nan tuahmi] nan miphun nih sunhlawihnak ah ka tel khawh lo caah ka lung a tha lo ngaingai. WA cozah nih, COVID-19 he pehtlai in, rikhamnak an tuahmi ruang ah WA kirlo in [khualipi] Canberra ah erh in ka umnak ruang ah a si.
Chin Miphun Ni ah sunhlawihmi dingmi le uanpi awktlak tampi a um. Culak ah, Australia ah a phanmi Chin Miphun hna nih Australia rammi sinak (citizenship) an ngah thluahmahmi kan hmuh. Hi Australia rami sinak (citizenship) ngah khawhnak tuahtuan le tuanrel lio ah ka tel ve caah ka uang, ka lawm.
Chin miphun pawl hi a luancia mi caan chung ah namnehnak le harsatnak tampi lak ah thawng ngai le raltha ngai in a dirmi miphun an si.
Chin miphun hna nih anmah holh le ca cawnnak an ngeih khawhnak hnga ding caah le [Australia] Chin miphun hna nih anmah miphun/nunphung kong cawnnak an ngeih khawh i, [mino/ngakchia] an nu le pa, pi le pu hna he anmah holh tein chonh khawhnak hnga ding caah ka cawlcanghmi le Chin miphun/community hna caah fakpi in chimrel piak kho (advocate) mi dirhmun le sinak ka ngeih caah ka lawm, uang fawn.
Atulio hi, Chin miphun nan caah a har takmi caan le dirhmun a si lio a si. Nain, hun chim than ka duhmi cu, nan caah ka dir in ka um zungzal ko. A hlei khun in, nan kaltakmi ramchung [Burma] ah ummi nan chungkhar pawl caah fakpi in ka dir, aa cawlcang.
A luancia mi kum chung ah, [Kawl] Ralkap nih nawlngaihnak hramhram in an lak i, harsatnak phunkip a chuak. Australia cozah nih, Kawlram ah Zauk phung a len khawh thannak hnga fakpi in a dirpi nak hnga ding caah ka si khawh chung in ka cawlcang, ka dir zungzal. Ralkap kha cozah nawlngaihnak hramhram a lakmi in a rannak in kan tumter khawhnak hnga ding ah kan cawlcang.
Atulio cu a harsat taktak lio caan a si. Nain, nihin ah ka uang taktak mi cu Australia ram chung ah a ummi Chin miphun vialte nih an cawlcangh ning le zeitluk in dah hmunkhat te ah an cawlcangh timi le an sining kong hi theihfianpi khawhnak hnga n cawlcang timi hi a si. Australia [khualipi Canberra] lawng silo in vawleipi ah [an miphun] sinak kong an chimrel nak hi a si.
Vawleipi pulrai hlan ahkhan Kawlram ka tlung, Hakha tiang ka kal. Chin ramkulh a dawhnak ka va hmuh. Hika in hin, nan community, nan chungkhar hna caah ka dirpeng, ka um peng ko timi hi rak thei ulaw. A tampi lak ah, a biapi in WA ah, MP sinak in kan tuah khawhmi cu midang caah va cawlcangh khawh hi a si.
Chin miphun nan konglam hi ka tuah dingmi ah a biapi bik a cunglei ah ka chiah pengmi a si timi hi rak theih pei u law. Parliament rian he pehtlai in, ka tuahtuan tik zong ah kan ruahchih peng zungzal hna timi rak thei ulaw.
Nihin [Chin Miphun Ni] bantuk hi, sunhlawih caan le a luanciami caan sining kong ruah than le hlawhtlinmi thlachuah rel caan a si bantuk in, atulio ah Kawlram ah harsa ngai in a ummi kan chungkhar, kan hawikom le community caah zeidah kan tuah khawh lai timi ruah than caan zong a si.
Nihin ah sunlawihnak puai cu kan tuah cang, nain nihin hi Chin Miphun Ni taktak cu a si rih lo [tiah ka theih ko]. WA ka rak kir tik ah, keimah pumpak in zeitluk in dah kan Prime Minister nih an dirpi hna timi le zeitlukin dah Australia ah lunglawmte in cohlan nan si timi kong kan chimh te hna lai. Cun, Australia Rammi sinak nan ngah le hmuhmi cung zong ah kan i lawmhpi tuk hna.
Chin miphun nan caah ka um zungzal, timhcia ka si timi hi rak thei ulaw. [Tutan ah] kan telpi khawh hna lo caah ka lung a tha lo, nain ka rak kir zau ko lai.
[Biakilh: Video clip in Western Australia in Senator Dean Smith nih a pumpak Facebook ah a thlahmi Chin Miphun Nih biacah cu a tawinak le fiannak in The Chinland Post nih kan lehmi a si. ~Editor]
About The Author
