Hakha, Chin Miphun Ni Ah Nilen Par Mawi Le Aa Thang Composer Hla An Sa Lai
Tawk Tling Thang| 2019 February 7| Tukum Hakha ah Chin ramkulh huap in tuahdingmi Chin Miphun Ni ah Kawlram hlasak thiam minthang Nilen Par Mawi le Aa Thang Composer telh in Lai hlum hlasakthiam tampi hlasaknak an ngei lai.
Hi kong he pehtlai in Fiakfairock Band in chairman a simi A Lian cu The Chinland Post nih pehtlaihnak kan tuah i atu bantuk in a chim.
“Cozah nih kanmah Fiakfairock Band nih ringawn lei vialte tuanvo laak dih ding in rian an kan khinh. Tukum Chin Miphun Ni, February 20 zan ah Fiakfairock band tawlrelnak in hlasaknak (stage show) a um lai. Hlasatu ding zong an i fiang dih cang. Yangon ah a ummi Nilen Par Mawi le Aa Thang Composer kan sawm hna i rat ding ah lunglawmte in a kan cohlan cang. Cun, Hakha in, Tawk Men, Biak Tha Cuai, Mercy, Van Siang Mang, Cung Hlei Lian le kanmah Fiakfairock band in hlasak thiam kan naule pawl zong an sa lai”.
Tawk Men, Biak Tha Cuai, Mercy, Van Siang Mang le Cung Hlei Lian hi Laihlum hlasak thiam le thapetu mizapi nih an uar ngaimi hna an si tiah kan theih.
“Ringawn tumtu le ringawn lei seh thirli vialte zong kanmah Fiakfairock band nih tuanvo kan laak dih lai. Kanmah duh ahcun Rangoon lei ummi hlasak thiam dang ozng sawm kan duh ko hna nin budget a um lo ruang le vuanci te nih Lai hlum dirhmun lawng in ti ko uh an kan ti caah atu bantuk in kan tawlrelmi a si” tiah Aa Lian nih a biapeh ah chimchih.
Nilen Par Mawi nih, “Tukum hi US ah hman ding in a kan sawm nain ka U Sung Tin Par visa a ngah lo i kei cu a sok hrimhrim zong ka sok ti lo. Cu lawng si lo in tukum hi Chinram pengdang cheukhat zong nih hlasak a kan sawm nain ka kal kho lo. Fiakfairock Band nih Hakha, Chin Miphun Ni ah hlasa ding in a kan sawm i rat ding in bia ka leh cang hna. Hakha cu ka chuahkehnak khua zong a si caah rak tlun lai hi kei zong nih kaa ngaih ngai ve. Damte in ka um ahcun February 19 khi Hakha phak ding in tlun kaa tim” tiah The Chinland Post ah a chim.
“Chin hlasak thiam minthang pawl a dangdang zong sawm kan duh ko hna nain budget nih a phakzawh lo ruang ah kan sawm khawh hna lonak hi a si. Sound system le music instrument hlan man lawng hmanh khi tangka sing tampi a dih cang. Ringawn tumtu le hlasatu an si rih lai caah tangka tampi a dih ding a si. Cozah nih tuandeuh ahcun music lei caah ks. sing 100 chiahpiak ding in budget kan suai. Hi zat hmanh hi kan chuahpiak kho te hna hnga maw. Hi zat tal cu kaan zuampiak ko hna lai” tiah Chinram cozah lei in tuanvo ngeitu upa pakhat nih The Chinland Post ah a chim.
Chin Community Of Indianapolis (CCI) upa hna nih tukum Chin Miphun Ni ah hlasa ding ah Myanmar lei in Chaw Suh Khin, Thang Paa, Ni Len Par Mawi, Sung Tin Par, Fred Hlim Puia an sawm hna. Sung Tin Par le Thang Paa hi visa an ngah lo caah aho hmanh an kal than lai lo tiah kan theih.
About The Author
