Chin Miphun Ni Ah Nun Can Sung Khuangcawi A Si Lai

Tawk Tling Thang | 2019 January 31| Chin ramkulh huap in Hakha ah tuah dingmi avoi 71nak Chin Miphun Ni ah khuang an cawi dingmi cu Nun Can Sung a si lai tiah kan theih.

Hi kong he pehtlai in Senthang peng in khuangcawi tawlreltu committee haotu Pu Thawng Zel nih, “Tukum khuangcawi ding hi tuanvo ngeitu upa hna nih Senthang nih tuanvo laak ding in rian an kan khinh. Cu tikah kanmah Senthang lei upa hna nih tawlreltu committee kan ser colh. Cu committee nihcun ahodah khuang kan cawi lai timi kan ceih. Pi Nun Can Sung @Mang Biak nu cawi ding in minung pali nih biatung an chuahpi i midang ahohmanh chuahpi le ceih um ti lo in kan zapi hnatlaknak in kan fehter” tiah The Chinland Post ah a chim.

Nun Can Sung\Photo: TCP

Khuangcawi dingmi Pi Nun Can Sung nih, “Tuanvo ngeitu upa hna nih nangmah kan in cawi lai tiah kan inn ah ra in a kan chimh tikah ka khuaruah a har tuk. Ka lau tuk i hmakhat te cu kaa zumh colh kho lo. Thil sining an kan fianh hnu ah lawmhnak in ka khat than. Zei ruang ah ti ahcun hi tluk in Senthang peng in ngaknu dawh tampi le mingei tampi an um ko bu ah keimah nutung a simi khuang kan in cawi lai an timi hi ka phut ruang ah a si hrimhrim lo. Ka pasal le kan chungkhar an kan dawt tuk ruang le an kan cawisan ruang ah a si. Tuanvo ngeitu upa zapi cung ah kan i lawm tuk” tiah The Chinland Post ah a chim.

Nun Can Sung \Photo: TCP
Nun Can Sung \Photo: TCP

“Pi Nun Can Sung khuangcawi siseh kan tinak a ruang bik zong hi midang kan fial hna ahcun a kiltu ding pa hi midang fial than zong a hau. Cucaah, amah cawi siseh law an pa nih kil beh seh ti kan duh ruang zong ah a si” tiah Pu Thawng Zel nih a biapeh ah a chimchap.

Nun Can Sung le an pa\Photo: TCP

Pi Nun Can Sung (kum 36) a chuahkehnak cu Thantlang peng, Congthia khuami Pu Zung Mang le Pi Far Vang fanu a si. Amah hi Senthang peng, Phaizawng khuami Pu Lai Luai Hmung he an i thitum hnu ah fapa pathum le fanu pakhat kan ngei. Pu Lai Luai Hmung hi Phaizawng khuami Pu Thang Nawn (tleicia) le Pi Ni Zi fapa a si. Amah a phun hi Thianhlun phun an si.

Nun Can Sung \Photo: TCP
Nun Can Sung le an pa\Photo: TCP

Pu Lai Luai Hmung nih, “Khuangcawi timi hi a fawi bak lo. Siakawng thah a hau, Vok thah a hau. Khuangcawi hla le laam cawnnak le a dangdang tete ah tampi a dih rih lai. Cozah lei nih ks. sing 30 bawmh ding an kan ti ko nain mah bawmhmi chim lo in a tlawm bik ks. sing 30 paoh cu kan dih chap rih lai. Zeiruang ah ti ahcun Siakawng pakhat te lawng hmanh ahkhin ks. sing 15 a si. Cucaah, kanmah chungkhar hi khuangcawi ding cu kan si ko nain a tlamtlin khawhnak ding ah zapi nih nan kan bawmh le nan kan dirkamh a herh” tiah The Chinland Post ah a chim.

Tukum Chin ramkulh huap in Hakha ah tuahdingmi Chin Miphun Ni ah Myanmar rampi President U Win Myint zong an sawm.

2017 kum avoi 69nak Chin Miphun Ni ah Hakha Khuathar in Mai Biak Tha Cuai khuangcawi a rak si. 2018 kum ah Hakha Khuahlun in Mai Run Sung an rak cawi. 2019 kum ahcun Senthang nih tuanvo laak in Pi Nun Can Sung an cawi lai.

Hngalhternak: The Chinland Post thawngpang le hmanthlak hi a ngeitu sin nawlhal ta hmasa lo in laak le hmanpiak cu caholh le media zulhphung na buar a si. 

Na ruahning rak langhter ve.. (Leave a comment)

%d bloggers like this: