Chin Miphun Ni Ah Daw Aung San Suu Kyi Nih Dr. Salai Khin Maung Thein Conglawmhnak A Pek
The Chinland Post| 2018 February 22| Ramkomh Myanmar khuahlipi Naypyidaw ah tuah mi a kum (70)nak Chin Miphun Ni ah State Counsellor Aung San Suh Kyi nih Chin mi Dr. Salai Khin Maung Thein (Doctor of Education) conglawmhpinak Roca a pek tiah kan theih.
Doctor of Education timi fimcawnnak lei doctor hi ramkomh Myanmar ram chung ah a hmu mi Dr. Salai Khin Mg Thein le a dang pakhat lawng an um rih tiah theih a si.
Dr. Salai Khin Maung Thein le a nupi Pi Thla Cuai
Dr. Salai Khin Maung Thein nih, “nizan ah Suh Kyi nih a rak ka chawnh i ka thesis tial mi hmailei ah zeidah kan ram ca ka saduhthah a ka hal. Ka thesis cu Myanmar fimcawnnak aa thlen ning (Transformation of Myanmar Education) ti a si. Cun kaa saduhthah kong ah ka leh mi cu, kan ram hi kanmah tein khuakhan lairelnak (Federal) kan hmuh khawh dih i kanmah nuhrin caholh tein fimcawnnak ngeih khawh ahcun kan thangcho ko lai tiah ka ruah ka ti i a tha tuk ee a ka ti ve” tiah TCP ah a chim.
Tukum Naypyidaw ah tuah mi Chin Miphun Ni ahhin Dr. Salai Khin Maung Thein lawng si loin Magwe Sianghleiruun ah lecturer a tuan lio mi Dr. Khai Va Ta zong Daw Aung San Suh Kyi nih conglawmhnak a pek chih leng ah, Chinram ah bawmhnak tam ngai a pe mi KBZ in U Aung Ko Lwin Le Dr. SaSa (Help and Hope) hna le Rampi huap in lentecelhnak ah Feikhawh min thang Nu pathum (Thlanglei Chin) pawl zong Pu Henry Van Thio nih conglawhnak a pek hna.
Tutan Chin Miphun Ni ah State Counselor Aung Sang Suh Kyi nih “Ramkomh Myanmar rampi hi kum 70 raldohnak le buainak a um cang. Hmailei Kum 70 tiang buainak a um than ding hi a si kho lo mi a si. A tu ah daihnak kan ser ti hna lai. Chinmi nih miphun pi nan sinak kum 70 a si ve ban tuk in ramkomh Myanmar zong independent kan hmuhnak kum 70nak kan si ve caah kan i khat bak. Fimthiamnak in rampi kan ser hna lai. Chimram tlangsang an i dawhtuk mi hi minung nih zohkhenhnak lungthin nan ngeih a herh” tiah biatawi chimnak ah a telh.
Tukum CND naypyidaw ah puai tuah nak kong lei tuanvo ngei Salai Pa Hnin (Department of Trade officer) nih “Tu kum CND cu ramkomh Myanmar pumpi huap lutlai an i tel dih mi nih a sunlawi ter khun. Chin miphun tling phun (12) lamnak an ngei hlei ah MRTV le Chin hlasak thiam hrim an thiam kho tuk. Mizapi zong 1500 leng kai an si . Media lei in MRTV, Skynet le a dang dang media tampi zong an ra. Naypyidaw CND kan tuahnak hi a tu 2018 he cun kum (6) a si cang i puai voikhat tuah ah a dihmi hi sing 140 lengkai kan dih” tiah TCP sin ah a chim.
Naypyidaw ah tuah mi Chin Miphun Ni cu hlunghlai ngai in tuah a si. Ramkomh Myanmar State Counselor Daw Aung Suh Kyi, President U Htin Kyaw te nupa, Vice President Pu Henry Van Thio te nupa, Hluttaw speaker U Win Myint te nupa, Ayotha Hluttaw Speaker U Man Win Khaine Tan te nu pa hna le rampi huap minister upa tampi an i tel kho tiah kan theih.
Dr. Salai Khin Mg Thein cu Lawngtlai khua mi Pu Ral Ceu le Ngalang khua mi Pi Par Tial hna fapa a si. A inn chung nu Pi Thla Cuai he fapa pathum an ngei. Amah hi Kalay University ah BA le Yangon University ah Geography major in MA degree a lami a si. 2013-207 tiang Martires City College, Philippines in Doctor of Education (D.ed) a lak. Tu lio cu Chin Civil Society Network (CCSN) ah monitoring and evaluation officer a tuan lio a si. Amah hi Kalaymyo ah Judson Education Center zong a rak dirh bal i Rawn Chin Authawng timi Chin Miphun tuanbia cauk zong a chuah pin ah Laimi nih kan ngeihmi magazine pawl ah cabia zong a tial lengmang mi catial thiam pakhat a si. CFB nih chuahmi The Chin Times zongah Chief Editor a tuan hmasabiktu zong a si. Tu hi Kalaymyo, Satawm sang ah a chungkhar he khua an sa i Carson Baptist Church an si.+++
About The Author
