Chin Miphun Ni Cu Chin Ramkulh Cozah Zungkhar Ni Ah Hluttaw Nih A Fehter Cang
TCP-Online| 2018 March 28| February 20, Chin Miphun Ni (Chin National Day) cu Chin ramkulh cozah zungkhar ni ah hman cang dingin ramkulh hluttaw nih March 28 ah a fehter cang.
Chin Miphun Ni, February 20 cu Chin ramkulh cozah zungkhar ni si ve dingin Tedim peng MP Pu Thang Deih Khup nih March 22 ni khan ramkulh hluttaw ah a rak chuahpi. Cu a chuahpimi cu Chin ramkulh hluttaw nih an ceih tikah March 28 ni khan an fehter hi a si.
“Hluttaw nih kan fehter cang ko i, ramkulh cozah nih a zulh ding lawng khi a si cang ko” tiah biatung a chuahpitu MP Pu Thang Deih Khup nih cun a chim.
1950 kum October 9 niah Chin Yeya Council Meeting nih February 20 ni cu Chin Miphun Ni ah hman dingin an rak fehter. Cuti an fehter hnu cun 1951 kum ah avoi khatnak Chin Miphun Ni cu Chin ramkulh Mindat khua ah an rak tuah i cu lio ah Kawlram hruaitu U Nuh zong nih a rak telpi khawh hna. 1988 kum hnu in Chin Miphun Ni cu tuah ti lo dingin ralkap cozah nih an rak kham. President U Thein Sein hruaimi cozah le CNF/A (Chin National Front/Army) i chawnhbiaknak le kahngolnak min an thut hnu ah 2013 kum ceo khan (phungning tein) Hakha khua ah hlunghlai ngai in tuah an rak thok than. Hihi CNF le cozah nih kaphnih hnatlak in min an thutmi chung ah aa telmi pakhat a si.
Chin Miphun Ni ah hin cozah zung zong khar siseh tiah Chin ramkhel hna nih cun voi tampi an rak hal len ko nain March 28 ni Chin ramkulh hluttaw tonpumhnak ceo ah cozah zung khar cang dingin fehter a si hi si.
Ref: The Voice
About The Author
