Chin Miphun Ni Hi Kan Upat Awk A Si
Chin National Day ( Photo: Robawm.com)
Salai Za Thawng| 2019 January 28| Chin Miphun Ni thawhkehnak kan zoh tikah bawi le sal thleidannak um loin aa tlukruang in kan um khawh nakhnga February 20, 1948 kum Falam ah tonpumnak an rak tuah. Cu ni cu Chin miphun kan tuanbia le ni sunglawi ah a cang lan.
Hi ni cu bawi le chia vialte an i tel dih i lungrual tein thleidannak nunzia hrawh dingin lungrual tein biachahnak an rak tuah. Cucu nihin tiangah Chin Miphun Ni cu sunhsak le hman cio a si i tukum cun a voi 71nak tiang kan phan cang. Nain a ruang phunphun ruangah Feb 20 ah Chin Miphun Ni hman thiam loin kan um. A bik in ramthumnak um mi ca ko ah hin a ni taktak ah hman khawh a si lo.
Mi kutang ah riantuan a si caah khawnhhal kha a si kho lo tiah Feb 20 he aa naih bik ni zarhte ni ah hman tawn a si. Nain Chin Miphun Ni hi kan sunlawih i kan sunsak tak ko ahcun Feb 20 cu Chin Miphun Ni a si caah rian kan off lai tiah ahlankan in khawnh rak hal khawh a si ko hnga lo maw ti ka ruat tawn.
Kan Miphun tuanbia lakah a sunglawi bik ni le kan sunhsak bik mi ni le caan hmannak tal ah cun a si khawhnak lam hi kawl khawh a si ko hnga maw ti ka ruat ngaingai. Nain a ni thengtheng ah kan hman khawh lo tal ah Chin Miphun Ni cu Feb 20 ah a sinak kha Banner ah langhter in kan hmannak ni kha Feb 16 ti bantukin langhter kan i zuam a hau.
Hmailei kum saupi ah cun kan fa/nau le hna nih Chin Miphun Ni a sunglawi bik ni kan ngeihmi ni le caan an thei ti lo sual lai phan a um. US ah cun fa le nau nih Chin Miphun Ni a thei lomi tampi an um len cang zong video clip ah kan rak hmuh cang. A poi lo tiah daithlang in kan tuahmi hi hnuah a poi bik ah a cang theu. Kan sunhsakmi kan ni sunglawi bik kumkhat voikhat te hi cu kan sunhsak tak ko ahcun a ni thengte tuah a har lo. Nain kan tuah lo tal hmanh ah Feb 20 hi Chin Miphun Ni a si ti an theih khawh nakhnga caah lam kawl peng kan i zuam a hau.
Ramchung zongah Chin Miphun Ni hi zung khar ni si ding tiangin Cozah sinah tu le tu an nawr len ko nain mipi nih kan sunhsak kho tuk loin ka theih. Chin miphun nih ni sunglawi kan i ngeihmi thleidannak le luatnak ni sunglawi bik a si caah zungkhar tiangin Chin Miphun Ni hi lawm u sih ti duh cio a si.
Sihmanhsehlaw Chin Miphun Ni kan hmanning hi ruah cuakmak tikah lungrualnak nakin hliamkhuainak a chuahpi hi a tam. Kan sunhsak mi ni sunglawi Chin Miphun Ni ah zuuri pawl hna nih a phuphu in mi velh an hmang i nunnak tiang a dih phah. Chin Miphun Ni a si caah kan Lai thilthuam dawh he zingka cu kan i thawh nain zanlei kan tin tik cu aa dawhmi kan lai coat cu zuritnak men ah le palek tlaih luatnak ah kan hman i zohchia in vawlei lakah kan bualhnak men tawn.
Hakha ah Chin Miphun Ni ah dawr a kharmi an um lo tluk a si. Chin Miphun Ni hi kan sunhsak i kan sunlawih len ko lioah mi cheukhat nih zei ah kan rel hoi lo. Cozah sin tiang ah zungkhar ni siseh tiah nawr cuahmah ko nain kanmah Chin miphun lila hmanh nih kan sunhsak lo i dawr hmanh khar kan sian lo ahcun zungkhar ni pompiaknak lam hi a har ngai lai.
Cucaah Chin Miphun Ni hi kan luatnak ni thleidannak a rawhnak ni a si bantukin Chin Miphun zong nih tukum cun avoi 71nak tiang kan hman cang lai va si kaw, kumkhat voikhat te kan ngeihmi Miphun Ni tal hi nang zeitindah na conglawmh i na sunhsaknak na langhter ve lai?
Hmailei ah cun ni sunglawi bik kan ngeihmi a sinak langhternak caah a ni thengte ah tuah khawhnak lam kawl le dawr vialte khar in Chin Miphun Ni hman khawhnak lam hi kan kawl cio ah a tha. Kan Miphun Ni hi kanmah Chin miphun nih kan sunhsak hrim a hau.
Tukum Chin Miphun Ni hi a nuamhnak lei lawng tuak loin Chin Niphun Ni(Chin National Day) aa thawhkehnak tuanbia le a luancia mi chungah Chin Miphun Ni na hmannak kha ruat chih buin Chin Miphun Ni nikhat te tal hi cu aa dawhmi nunzia he hman i zuam hram hna u sih.
About The Author
