Chin Miphun Ni Hmanpi Ding In Sawm Mi Mizoram Chief Minister Pu Zoramthanga A Ra Kho Lai Lo

Salai Elvis|2020 January 27| Chin ramkulh huap in Thantlang khuaah tuah dingmi a kum 72nak Chin Miphun Ni ah ramkulh cozah nih khuallian in sawmmi Mizoram Chief Minister Pu Zoramthang cu relrem lo nak a ngeih caah a telpi kho hna lai lo tiah theih a si.

“Chin Miphun Ni hman pi dingin sawm mi Mizoram Chief Minister Pu Zoramthang cu Budget Session lio a si caah a ra kho lai lo biafiang a si ko. A mah zaka ah a hawile Pu Tawn le Pu Rammawi tu a thlah hna lai. MLA in Pu H. Biakzau zong rat aa tim Pu C. Ngunliancung zong rat dawh a si ko.” tiah International Chin Forum General Secretary Salai Lahnim nih TCP ah a chim.

Mizoram um mi hna cu Chin cozah nih phungning in a sawm hna pin ah Thantlang khuanupa lei zong nih Lawngtlai um Laimi pawl hna zong puai hmanpi dingin an sawmmi hna an si.

“Mizoram cu kan inn pa an si pin ah an mah zong Chin Miphun an si ve caah kan sawm hna nak a si. Cu chungah Chief Minister le Hluttaw Speaker zong sawm an si. Mi zei dah an ra kho te lai timi tucu kan hngal rih hna lo.”tiah ramkulh chimphuannak nawlngei tu U Soe Htet nih TCP ah a chim.

Thantlang Chin Miphun Ni hmang ding in Mizoram lawngtlai um mi Lai Students siangngakchia pawl (Troupe member) minung 17 zong Lai laam phunphun hmuhsak ding an i timh pin ah hlasak thiam minung 3 hrawng, EC chungtel ming 10 hrawng an zapi Mizoram in khual 50 hrawng tlun dingin timhtuahnak kan ngei. Kal a duh mi an tampi nain sawm mi an si lo tikah a har pah. Lai cozah a si mi, Lai Autonomous District Council (LADC) le Central YLA cu sawm kan si lo.”tiah a cunglei upa ICF- G.S nih a chimchap.

Tukum Chin Miphun Ni tuahnak ding caah sing 3000 tluk dih ding in suaisam a si i cuchung ah ramkulh cozah nih sing 1000 budget a pek hna i a tangmi sing 2000 tluk hrawng cu Committee hna he i bawm in ramchung/leng ah an kawlhawl lio a si. Mah ni le caan ah ramchung/leng in khual 1000 tluk phan dingin timhlamh chuang mi a si tiah kan theih.+++

 

Na ruahning rak langhter ve.. (Leave a comment)

%d bloggers like this: