Chin & Mizo Hmailei Saduhthah Ram Timi Salai Van Bawi Lian Tialmi Cauk Tlangzarnak An Tuah

0

Salai Ngun San Aung| 2018 May 10| Salai Van Bawi Lian nih tialmi Chin & Mizo Hmailei Saduhthah Ram timi cauk cu 2018 May 10, The Chinland Post zung ah tlanzarnak an tuah i minung 30 tluk an chuak kho.

CACC in Literature and Publication Secretary Pastor Lai Cung nih caan a tlaih i catialtu Salai Van Bawi Lian nih a cauk kong fianternak le a saduhthah pawl chimnak a ngeih. Cauk tlangzarnak (Book Release) cu Pu Siang Mang nih a chim dih hnu ah cauk ca thlacamnak le aa tel mi chung biachimnak le biahalnak tuah a si.

“Hi cauk nih aa tinhmi hi Mizo le Chin kan chuahkehnak tuanbia hrampi kherhlai le unau kan sinak langhter len kha si tiloin Mirang uknak in nihin ramkhel kan dirhmun ah kan hruaitu hna an lungput, Mizo nih zeitindah an kan hmuh? Hmailei ah tah Mizo, Chin, Bawm tibantuk unau a simi pawl hi hmunkhat ah a zalong mi ram pakhat dirhti (Independent) maw kan duh lai asiloah India or Myanmar ram pakhat khat sinah Federal in um timi dah? Mizo kan unau nih ram le miphun dawtnak ah siseh, caholh le fimthiamnak lei ti bantuk ah an kan teituk mi zong hi kannih zong i zuam deuh tuah usi ti bantuk kha aa tinhmi a si” tiah catialtu Salai Van Bawi Lian nih a chim.

Pu Siang Mang nih, “hi bantuk kan miphun kong tuanbia tialnak cauk kip chung in khomh suat i felfai tein tialmi cauk tha kan ngeih hi Pathian thluachuah a si. Rel a phu tak tak. Mizo he unau kan sinak kong tuanbia hi an tial pah cio nain Independent kan lakh nu kong aa um tuk lo. A bultan deuhmi a lo. Tu akn fapa nih a tialmi cu a hlan kong, tu lio kong le hmailei ah zeitindah kan si lai timi kong aa tel dih caah rel tlak tak tak a si. Mizapi kut a phak i mi tam pi nih kan rel cio khawh nak ding khuakhan pi cio awk ah a tlak tiah ka ruah. Rel cio hrim hrim uh” tiah Cauk tlangzarnak a tuah pah ah a chim.

Pu Chawn Kio nih, “tu te lawng hi ka kutcung ah cauk a phan. Tlawmpal ka rel tikah ka rel bal lomi Chin kong tialnak cauk tha tha a rak rel i aa chirhchan hna ti ka hmuh i kaa lawm tak tak. Cauk tha tak tak a si. Chin miphun nih hi bantuk hram fek tein tialmi cauk tha tampi kan herh” tiah a chim.

“Chin miphun nih cauk kan chuahmi hi a dihlak ah uk 1000 a tling rih men lai lo. Cu hmanh ah biaknak kong deuh lawngte a si. Miphun tuanbia le ramkhel cauk hrim cu kutdong khiah zat te lawng kan ngei. Cucaah hibantuk in kan tuanbia kong cauk tha tak a kan chuahpiak tu Salai Van Bawi Lian cungah Caholh lei mit hrim in kan i lawm i upatnak ka pek” tiah Pastor Lai Cung nih a chim.

Catialtu Salai Van Bawi Lian cu Thantlang peng Vomkua khuami a si i tu hi Falam UPC ah Pastor a tuan liomi mino te a si. Cauk cu uk 1000 lawng an nam i CACC, The Hakha Post le The Chinland Post zungah cawk khawh a si. Uk khat ah 3000 MMK a si.

About The Author

Na ruahning rak langhter ve.. (Leave a comment)

%d bloggers like this: