Chin MP Zapi Nih Vice President Henry Van Thio Mee An Pe Dih Lo

0

City Hunter| 2018 March 28| March 28 i tuahmi ramkomh hluttaw President thimnak ah Vice President Henry Van Thio nih mee 18 a lawng ahmuh caah Chin MP zapi nih mee an pe dih lo. Pyithu hluttaw le Amyotha hluttaw ah Chin MP zapi hi 21 an si tiah kan theih.

Myanmar ram president thimtu ramkom hluttaw MP 656 lakah Chin MP zapi hi 21 an si. Kanpetlet peng in Pyithu hluttaw palai MP Pu San Khin a thih ruang ah minung 20 lawng an taang. March 28 ah tuahmi Myanmar ram President thimnak ah U Win Myint nih mee 403, U Myint Swe nih mee 211 le Pu Henry Van Thio nih mee 18 lawng a hmuh. Hnonmi mee zapi hi 4 a si. President thimnak ah khunh a hal i aa tel kho lomi MP zapi hi 20 an si.

Vice President Henry Van Thio mee 18 a petu hi mi zeidah an si timi hngalh khawh a si lo. Sihmanhsehlaw, mee 18 lawng a hmuh caah miphun dang cu chim lo, Chin MP zapi hmanh nih mee an pe dih lo tiah theih khawh a si.

2016 kum President thimnak ahcun Pu Htin Kyaw nih mee 360, U Myint Swe nih mee 213, Pu Henry Van Thio nih mee 79 an rak hmuh. U Myint Swe hi tutan thimnak ah mee 2 in a tum deuh. Pu Henry Van Thio cu mee 61 in a tum deuh. U Win Myint ah mee an bungh dih ruang ah Henry Van Thio mee hmuhmi fak tuk in a tum/a zor. Myanmar ram president thimnak ah mee tlawm bik in tuanbia a tialtu Vice President si dawh a si cang.

Aung San Suu Kyi (L) and vice presidents Henry Van Thio (2nd L) and Myint Swe attend the handover ceremony from outgoing President Thein Sein and new Myanmar President Htin Kyaw at the presidential palace in Naypyitaw March 30, 2016. REUTERS/Ye Aung Thu/Pool

Sihmanhsehlaw, Chinmi tampi nih Vice President kan tuan khawh hmanh hi PATHIAN thluachuah a si. Tutan cu President hi kan covo a si lo. President tuan sehlaw Kawl pawl le lukawng pawl a buai ding an tamtuk lai_ Khrihfa a si ruang ah. Hi dirhmun te a ngah thanmi hi thluachuah a si deuh tiah hnemhnak bia a chimtu le ca a tialtu an tampi ve tiah kan theih.

Ramkhel lei a cawlcangtu cheukhat nihcun, U Win Myint hi mee 300 hrawng le Henry Van Thio nih a tlawm bik mee 100 tal hawih khawh tuk ding a si ko nain an hawih lo. Chin MP zapi nih mee an pe dih lomi le mee tlawm tuk lawng a hmumi cu kan lung a tha hrimhrim lo. U Win Myint nih President tlin khawhnak thimfung a ngah khi a za ko, a hleihluat in mee a hmuh ruang ah miaknak a um lo. Henry Van Thio zawn an ruat lo tuk lawmmam tibantuk in online facebook ah ca a tialtu cheukhat an um ve.

 

Pyithu Hluttaw Ah Chin MP Min Cazin

Ramkomh hluttaw ah Pyithu hluttaw in Chin MP 9 le Amyotha hluttaw in Chin MP 12 an um. Pyithu hluttaw in Chin MP 9 hna cu; MP Pu Hniar Uk (Hakha), MP Pi Ni Sui Lian (Thantlang), MP Dr. Salai Riang Vel (Falam), MP Pu Cin Sian Thang (Tedim), MP Pu Kham Khan Thang (Tonzang), MP Pu Nay Lin Aung (Mindat), MP Pu San Khin (Kanpetlet_ MP a tuah cuahmah lio ah a thi cang), MP Pu Pa Thang (Matupi) le MP Pu Sein Aung (Paletwa) an si. MP Pu Cin Sian Thang le MP Pu Kham Khan Thang hi Zomi Congress for Democracy (ZCD) party an si. A dang paoh cu National League for Democracy (NLD) party an si dih.

Amyotha Hluttaw Chin MP Min Cazin

Amyotha hluttaw in Chin MP hna cu; MP Pu Ngun Hei (Hakha-NLD), MP Pu Siang Awr (Hakha-NLD), MP Pu Bawi Khing (Thantlang-NLD), MP Pu Zung Hlei Thang (Falam-NLD), MP Pu Kin Gam Lian (Tedim-ZCD), MP Pu Cin Khan Pau (USDP), MP Pi Cing Ngaih Mang (ZCD), MP Pu Mang Law Maung (Mindat-NLD), MP Pi Khin Shwe Lwin (Kanpetlet-NLD), MP Pu Lal Min Thang (Matupi-NLD), MP Pu Hoih Tin (Paletwa-NLD) le MP Pu Myo Htat @ Salai (Paletwa-NLD) an si.

About The Author

Na ruahning rak langhter ve.. (Leave a comment)

%d bloggers like this: