Chin National Dialogue, Falam le Hakha Lamzawhnak Hna Cu The Chinland Post Nih Event of The Year-2017 Ah Kan Thim

0

The Chinland Post nih kumtin a thim tawnmi Chinram a hnintu Le langsaar deuh in thil a cangmi (Event of the Year, 2017) cu kan thim than cang i 2017 kum chung i Chinram a hnintu le langsaar deuh in thil a cangmi thawngpang cu Thantlang ah tuahmi Chin National Dialogue, Falam le Hakha lamzawhnak hna cu a tanglei bang in kan hun thim than.

Falam le Hakha Lamzawhnak

Chin ramkulh chaklei ummi Falam le Hakha khuapi sipin area kauhchap dingin Chin ramkulh Cozah an riantuan mi cu ningcang a si lo tiin Falam peng in minung 100 fai nih le Hakha in minung 300 fai nih 2017 chung ah an duhnak lam zawh in an langhter. Hi kong ah khuapi sersiam le kauhchap an duh lo tiin lam a zawhmi pawl a soisel mi zong an um len bantuk in Cozah nih ningcang tein rian an tuan lo ruang ah hi bantuk thil a chuah nak a si ti in cozah lei sual a phaw tu zong an tlawm lo.

Falam le Hakha lam zawh lio

Falam khuapi kauhchap ding in an khiah mi cu Laizo khua mi nih kan pupa chan in kan vawlei a si i kan thingram a si. Cun hi kauhchap ding chung hmunhma ah hin Laizo minung khua a sa mi le hmunhma a ngeimi zong an tam pi. Hi hna pawl caah zeibantuk in khua kan ruah lai i rian kan tuan lai timi cozah nih felfai tein ton le ruahnak hal nak zong a um lo an ti. Hi lamzawh in duhnak langhternak ahhin minung 100 fai an i tel tiah theih a si. Hi kong cu ramchung ram leng in chin miphun nih 2017 chung i biatak tein rel le ceihphai mi thawngpang ah aa tel.

Hakha khua sipin area kauhchap ding chung ah pupa ram ngei le dumhau tuahmi, satil zua mi si hna seh khua ning in thinghual le khuathar tlak nak ding an haak mi hmunhma tiang cozah nih sipin area a kauhchap tikah Hakha khuathar leng ah Hakha peng Nipi khua mi tibantuk minung 300 leng nih 2017 December 11 ah lam zawh in hi kongah cozah nih rian a tuan ning a dik lo tiin an dohdalhnak cu an langhter.

Hi kong cu vawlei cung hmun zakip um Chin mizapi nih ceih cio a si. A cheu nih khuaram an daw lo, anmah zawn lawng an i ruat a ti mi zong an um. Khat lei ah Chin ramkulh cozah nih felfai tein rian a tuan lo caah a si tiin cozah lei a mawh phurh mi zong an um. Cuticun Hakha khua sipin area kauhchap nak kong cu 2017 chung ah Chin miphun nih kan rel bik le ceih bikmi thawngpang hna lak ah pakhat a rak si.

Cucaah The Chinland Post nih 2017 chungah Chinram a hnin tu le langsaar deuh in a cang mi thil (Event of the Year) ah Falam le Hakha mizapi nih lam zawh in an duhnak an langhter mi kong kan thimnak hi a si.

 

Chin National Dialogue, Thantlang

Thantlang, Chin National Dialogue tuah lio

Kawlram remdaih ceihmainak lamthluan ah biapi bik in aa telmi hnathlaknak cu Kawlram ah Federal phunglam sernak ding ah miphun huap in biaruahnak tuahding timi hi a si. Cu nih aa timhmi cu Kawlram ramkhel hmailei lamtluan sernak ah miphun pakhat cio nih an duhning le an hmuhning funtom in ramkomh in ramkhel ceihmainak ah chuahpi ding a si. Asinain Chin miphun huap in ramkhel biaruahnak cu ramkomh cozah lei nih an duh lo caah Kawlram ramkomh remdaih ceihmainak kai lo ding in CNF nih an hmuhning zong Media sin in an chimh. Kawlram cozah nih Karen lawng a onh hna i remdaih min a thumi Rakhine, Shan le Chin cu a onh hna lo. Kachin zong zatlang bu hrihawhnak in an tuah nain an tuah cuahmah lio ah ralkap nih an kham hna.

Chin ramkulh zong khenkham a si cuahmah lio ah cozah lei nih ahnu ah an onh than hna i avoi khatnak Chin ramkulh huap in ramkhel kong ceihmainak cu Thantlang ah February 27 – 1 March 2017 tiang tuah a si. Hi nithum chung tuahmi ah ramkomh sernak ah ramkhel he aa pehtlaimi Federal kong, Biaknak zalonnak (Secular State) kong, Multiple Democracy (zauk) phung kong, Nuhrin covo kong, Mitlawm-u covo (minority rights) kong, Rampi nawlngeihnak (Sovereignty Power) kong, Nu le pa tlukruannak le miphun tlukruannak kong, mahte khuakhan lairelnak (Self-determination) le a dang mulmal (Other Principles) kong hna an ceih.

Hi tonpumhnak ah Chin ramkulh in peng aiawh, ramkhel party, CNF, rawnlei ummi Chin miphun, thiamsang hna telh in minung 500 fai an kai kho. A bik in konglam tete ah biafunnak tampi an tuah kho bantuk in, Chin miphun nih Kawlram in chuahnak nawl hi i tel seh timi biatung tiang a chuak. Party cheukhat le ramkhel upa cheukhat nih Kawlram in chuahnak nawl hi hal siseh an ti tikah ramkomh cozah tiang an lau tuk pin ah a kaimi tampi karlak ah lung buaibainak le ikhah lonak zong a chuah. Asinain Kawlram ramkomh in chuahnak nawl telhding kong cu hnathlaknak ah lak lo in meeting record tu ah an chiah.

Kawlram ramkomh sernak caah Chin National Dialogue tuahnak hi Chin ramkulh le Kawlram tuanbia ah philh lo dingmi pakhat a si. May 2017 zarh thumnak i tuahmi Union Peace Conference – 2nd Panglong Conference ah Thantlang i biachahmi pawl cu Chin miphun ai-awhtu in a kaimi nih an i kalpi. Nihin tiang ah Thantlang i ceihmi Chin miphun huap ramkhel ceihmainak hi ramkomh huap in a hluhchuahmi tampi a um rih lo nain, Chin ramkulh tuanbia ah a tang dingmi le Chin miphun nih ramkomh Kawlram sernak caah kan duhmi biachahnak pawl kan ngeih khawhmi tonpumhnak a si caah The Chinland Post nih 2017 i Chin Event of the Year ah kan thimnak hi a si.

Cucaah The Chinland Post nih 2017 chungah Chinram a hnin tu le langsaar deuh in a cang mi thil (Event of the Year) ah Falam le Hakha mizapi nih lam zawh in an duhnak an langhter mi kong kan thimnak hi a si.+++

About The Author

Na ruahning rak langhter ve.. (Leave a comment)

%d bloggers like this: