Chin Ralzaam Le Australia Chin Miphun Citizen Kong Ah Pehzulh Kan I Zuam Lai; Senator Dean Smith Le Issac Stewart

The Chinland Post| 2019 May 14| Australia Chin miphun Khrihfa Bu hna nih Senator Dean Smith le Isaac Stewart cu 2019 May 12 (Zarhpi Ni) chun ah a hleikhun (special) in thla an campiak hna tiah kan theih.

Perth ummi Siyin Baptist Church, Western Australia Chin Emmanuel Christian Church le Full Gospel Worship Centre Biakinn pathum nih Senator Dean Smith le Isaac Stewart (Liberal For Cowan) cu an Biakinn cio ah thluachuah hal in thla an campiak hna tiah theih a si.

Hi thlacamnak hmun ah thil biapi phun hnih an chim. A bik in, Senator Dean Smith nih cun, “Chin miphun nih hi bantuk in nan ka dawtnak ka hmuh tikah kaa lawm tuk hringhran. Nan ka dawtnak le nan ka bochan bantukin kan i zuam ve lai. A bik in; 1. Chin Ralzam hna cu pehzulh tein laak ding in kaa zuam lai. 2019-2020 kum chung caah Chin Ralzam covo cu Australia Cozahpi nih a dang tein an chiahpiak cang hna. 2. Chin Miphun nih nan ton cuahmahmi rammi ‘Citizen’ laaknak kong cu biatakte in bawmh khawhnak kaa zuam lai tiah a ti.

Prime Minister Scott Morrison cu Khrihfa zumtu tha pakhat a si leng ah Chin miphun kong hi thate in a theihngal cia mi a si. Prime Minister a si hlan, a luan ciami kum 10 ah Chin Ralzam pawl zong Malaysia ah a rak ton bal cang hna. Chin miphun ralzam kong biatak tein a rak hlat cangmi a si tiah theih a si.

“Australia ah Chin Ralzam pawl laaknak ding ah a kan bawmtu cu Liberal Party hi an a si. Chungkhar le rualchan cingla auhnak a tuahmi vialte nih Scott Morrison le Liberal Party hi thlacamnak in rak bawm cio ve hna uh sih” tiah Pu Renny Ceu Lian Mang nih a chim.

“Labor Party nih Ralzam tampi kan laak lai an timi chung ah Chin Ralzam pawl an i tel lo. Labor Party nih Ralzam lak ding i timh tuahnak an ngeihmi cu Australia ram chung ah nincanglo in tilawng in a rak lutmi hna le Middle East Ralzam hna hi laak ding in timh tuahnak an ngeih mi cu a si” tiah a biapeh a chim chap.

Ramhnih nak ah a taangmi Chin Ralzam hna Ram thumnak an phanh khawh cu kan miphun thanchonak pakhat a si. Nain, ram hnihnak ah a ummi Chin miphun Ralzam vialte hi Ramthumnak ah an lan dih lai lo. UNHCR nih Chin miphun 18,000 tluk lawng hi Ralzam sinak a pekmi le a pommi an si. Nain, Chin miphun hi Malaysia lawng ah, 30,000 leng an um. Cucaah, atulio Austrlia nih hmai a thlakmi Chin miphun lak dingmi ahhin zapi caah cun a fawi lo dingmi a si tiah Chin miphun covo kong cawlcangtu pakhat nih cun a chim.

Kan Miphun le kan Khrihfabu tiang in thanchonak a chuahpitu ding a si caah kan Miphun dihlak zong nih thla fakpi in rak cam cio hna uh sih tiah Thlacamnak hmun ah a chuakmi sin ah biacahnak zong an ngei tiah kan theih.

Senator Dean Smith hi amah pumpak hrimhrim in Laitlang ah a tlung balmi a si. Chin miphun caah duhnak le zawnruahnak fak taktak a ngeimi a si. Cu lawng silo in, Malaysia ah khua sami Chin miphun ralzaam hna ca zong ah fakpi in a cawlcang i amah pumpak chawva dih tiang in, Chin ralzam ton ah, Malaysia tiang voi tampi a tlawng tiah kan theih.

Amah pekmi title; Chin Khrihfabu nih Senator Dean Smith le Isaac Stewart cu thla an campiak hna.

Leave a Commnet

%d bloggers like this: