Chin Ralzam Kir A Duhmi Hna Cu Vice President Henry Van Thio Nih A Tawlrelpiak Hna Lai
TCP-Thantlang| 2018 November 9| Ramleng ummi Chin ralzam pawl Kawlram ah kir a duhmi hna cu Vice President Henry Van Thio pumpak in a tawlrelpiak khawh ko hna lai nain ahmuh (case) a ngeimi pawl caah cun a har deuh lai tiah All Chin Society Yangon (ACSY) chungtuantu Pu Naing Thang nih November 7 ah a chim.
“Ramleng um Chin ralzam cheukhat hna zong rak kir a duhmi an um ko. An khuaram an rak kir hlan ah kanmah sin ah thawngthanhnak an tuah ta a herh. Airport ah lah-wah-kah le palek sin ah buaibainak an ton nakhnga lo kan tawlrelpiak hna lai. Hi kongah Vice President Henry Van Thio zong kan chimh chawnh cang. Amah zong Chinram caah tuanvo a ngei ve. Cucaah hi kong hi kan tawlrelnak a si. Ahmuh (case) a ngei mi pawl caah cun a har deuh lai nain midang caah cun a tlamtling ko lai” tiah Pu Naing Thang nih a chim.
Ramleng phan mi Chin ralzam kong he pehtlai in 2018 November 3 ah All Chin Society Yangon (ACSY) hruaitu hna le Vice President Henry Van Thio cu ton biaruahnak an ngei. Hi kong ACSY lei deuh nih tuanvo lak ding, ACSY le cozah i bawm in Chin ralzam mi hna aw-ann ngeih hnu ah a herh ning in bawmh hna ding kong, a rak kir mi hna cu innchungkhar cazin, hmat-pungtin tuahnak kong zongah fawizaang tein tawlrelpiak hna ding kong ,a bik in ceihmainak an ngei.
A tu lio Chin ralzam hna cu Malaysia ah 30,000 tluk, India ram ah 5,000 tluk an um hna. Chin ralzam hna cu 1998 kum in 2010 kum kar hrawng in a ruang tampi ruangah ramleng lei ah an phan hna tiah theih a si.
Ref: Akonthi
About The Author
Um nak Inn, Paisa leh tawlrelpiak Ai tim khawh ning ca he tha Te in chuah ding si cu…hngak chia bia chim he Ai lo guarantee ca zawng um lo?????