Chin Ram Cozah Nih Chuncung Ram National Park Tuah An Timhmi Le Lai Tili An Dilmi Chuncung Mizapi An Lungtling Lo

0

The Chinland Post| 2018 Tho 11| Chin ramkulh cozah nih Zinghmuh Tlang National Park tuah dingah a timhlamhmi hi Hakha peng, Falam peng, le Thlantlang peng pathum ram chungah a ummi a si. Hakha peng, Chuncung ram hi ekah 7756 aa tel, Falam peng hi ekah 6809 aa tel, Thlantlang peng hi ekah 5372 aa tel. Chuncung nih kan dohkalhmi hi kanmah kan ramchung ekah 7756 hi kan kan dohkalhmi a si.

Chin ramkulh cozah bawi pawl cu 2017 August 19, Chuncung ah an ra i National Park tuah dingah kan ram an kan hal. Khua mizapi nih kan nunnak hrampi a si cash kan siang lo. Kan ram kan sian lonak a ruang;
1. 1890 hlan in kan pupa hna nih an rak thlawhmi ram, an nunnak hrampi a si lengah, tu chun ni tiang in a kan cawmtu kan ram a si. Rak thlawhmi lopil pil 8 aa tel.
2. Inn zuat satil caw, naa, sia, rang, kan chiah hna nak hmunhma a si. (satil zuat hi kan pum pawcawmnak pakhat a si caah an tlonnak ding hmunhma hi biapi tuk)
3. Chin cozah nih an kan laakpiak a si ah cun innzuat satil chiahnak hmunhma a um lai lo. Kan cinthlakmi thlairawl vialte kan satil zuatmi nih an ei dih lai i Chuncung mizapi kan pawcawmnak tiang in a hnorsuan lai.
4. Kan i dornak caah kan in kan lo, thingrua kan laaknak hmunhma a si.
5. Kumtin tein Lungpang khuaihliti zong kan laaknak hmunhma a si.
6. Kan pupa hna chan ah Zinghmuh Tlang hi kumhnih dan ah vok in an rak biak i, kum thum dan ah Sia in an rak biakmi a si i, tuanbia a ngeimi rak sunhsak tukmi a si.

Mah a cunglei i langhtermi vialte ruangah hin Chuncung mizapi nih National Park tuah dingah kan ram kan sian lonak chan cu a si. Cucaah Chuncung mizapi nih kan ram kan siang lo tiin 2017 September 18 ah duhlonak ca kan tial i inn 315 nih min kan thut i Chin cozah zung pawl ah kan chiah.

Mah hnu ah Chin cozah le bawi pawl cu 2018 May 27 ah Chuncung ah an ra than i khua mizapi he National Park tuahnak kongah tonnak an kan ngeih than. National Park tuah kan duh lonak le kan lung a tlin lonak zong meeting chungah tampi chim a si. Mah hnu ah a voihhnihnak duhlonak ca kan tial than, Inn 322 nih duhlonak min kan thut i Myanmar rampi President sin ah kan kuat.

Mah tluk in mizapi nih kan duh lonak kan langhter lengmang ko bu ah, Chin cozah nih khuabawi theihternak zong tuah loin Kan Chuncung ram, kan sunhsakmi, tuanbia a ngei mi, pangpar phun tampi a umnak, thal caan ah Youth Camp kan tuahnak, Crusade, Camping, kan tuahnak hmun Lai tili cu hrawh hram an thawk i, zohdawh tidil ah tuah an timh. Riantuan hram an thawk ti thawng kan theih in Khua min in nan riantuanmi hi ra kan baanpiak uh tiah Chin cozah sin ah ca kan chiah.

Mah ca kan chiahmi cu zei ah an kan relpiak lo i pehzulh in rian an tuan thiamthiam. Cucaah 2018 September 4 ah Chuncung khua mizapi 180 leng nih rian a tuantu pawl hna cu, “Nan riantuanmi hi ra kan baanpiak uh” tiah a nemnak tein kan ti hna. Zeicahtiah mizapi duhnak tel loin Chin cozah nih an tuanter hnami asi. Rian a tuanmi hna zong nih an rian cu an an baan i an tlung ve. Chin cozah nih a rak thlahmi hna bawi pawl le palek pawl zong Laiva Dam pawng tiang meithal, zenkuan, hriamnam he an rak kai hna.

Chuncung khua upa hruaitu ton kan in duh hna an ti caah, Chuncung nih kan ngeihmi Hall ah tonnak kan ngei. Mah zongah cun National Park tuah kan duh lonak le Lai tili an dilmi kan duhlonak kong tampi kan chimh hna.

2018 September 9 ah Chin cozah nih Chuncung khuabawi le upa hna cu an auh hna i kan riantuanmi hi pehzulh in ra kan tuahter uh tiah an ti hna. Khuabawi le khua upa hna nih an lehmi hna cu “Khuapi nih an duh lomi cu tuannak nawl kan in pe kho hna lo” tiah an ti hna. Mah a zan ah cun khuapi general meeting auh a s i, Khua mizapi nih an timi cu “Minute pakhat second pakhat hmanh tuannak nawl kan pe than kho hna lo” tiah an ti. Mizapi nih an duh lo an lung a tling lo ti an theih ko bu ah, 2018 September 10 ah security police minung pariat he an riantuan hmabaan cu an hung tuan than.

Chin cozah nih National Park tuah dingah an riantuan ning le an cawlcangh ning zoh tikah Democracy hruaining phung he aa kalh. Chuncung mizapi nih hi tluk in kan duh lonak le kan lungtlin lonak ca zong in kan langhter, kan hmurka zong in kan chim len nain zei ah an kan relpiak lo, hramhram in tuah an timhmi kan hmuh tikah Chuncung mizapi kan lung a fak, kan thinlung a kekkuai. Cucaah, Chuncung mizapi nih lungthulh kan i tim lo, kan lung a tlinlonak le kan ram kan sian lonak cu sandah piahnak in langter ding timhlamhnak zong kan ngei.
Catialtu: Pastor Mang Nawl Lin

About The Author

Na ruahning rak langhter ve.. (Leave a comment)

%d bloggers like this: