Chin Ramchung Ah COVID-19 Ngiatthlai Mi Hna Chungah Zawtnak An Thiang Tiin Minung 375 An Thlah Cang Hna

TCP-Thantlang| 5 April 2020| Chin ram chungah April 5 tiang cazin ningah COVID-19 zawtnak ruangah lunghrinh mi le ngiatthlai mi pawl Quarantine tuah le zohfel dih hnu ah zawtnak an thiang cang tiin minung 375 thlah an si cang tiah ramkulh ngandamnak zung cazin ningin theih a si.

Atu ni tiang Chin ram chungah COVID-19 zawtnak kong he pehtlai in ramleng in Chin ram ah a tlungmi minung 529 an si i cu chungah lengchuak lo in, inn chung ah khumherh mi (Home Quarantine) in minung 130 chiah lio an si. Cun Community Based Facility Quarantine zong Chin ramchung ah hmun 23 ah tuah a si i cu chungah chuak lo in khumh erh mi minung 23 ngiatthlai lio an si fawn.

Chin ram kulh huap in COVID-19 zawtnak hrik minung pakhat sin ah hmuh a si hnu in midang sinah i chawnh in hmuh a si ti lo. Zawtnak hrik an hmuh mi pa zong fahnak le hi kongah hmelchunhnak a um ti lo a thiang cang tiah Chin cozah lei nih thawngthanhnak tuah a si cang nain, siizung in cun an chuah ter rih lo.

Mah pin ah Chin ram chungah hi zawtnak kong he pehtlai in Lunghrinh mi dang an um ti lo, nain Chin ramkulh leng in a rak lut mi minung pawl lawng hmun dang teah ciah in an ngiatthlai lio hna a si. Hi zawtnak cu Chin ram chungah a karh in a um ti lo nak hnga caah Chin cozah le Committee dangdang hna nih runvennak kongah hma an lak lio cuahmah zong a si.