Chin Ramkulh Ah Bangladesh Rammi Minung 12 An Tlaih Hna

TCP-Hakha| 2018 October 18| Myanmar-India No.2 ramri chawlehthalnak sakhaan Chin ramkulh Rihkhawdar khua ah India leikap in Myanmar ram leikap ah thlithup in a rak lutmi Bangladesh rammi minung 12 le a autu hna Myanmar rammi pahnih cu October 18 zingka suimilam 4:30 ah kan tlaih hna tiah Information Ministry zung in lutlai chang Pu Lalpeklawma sin in kan theih.

Myanmar-India ramri chawlehthalnak hlei cu zanlei suimilam 6:00 in zinglei suimilam 6:00 chung cu luhchuah khawh a si lo i India ram in Myanmar ram leikap ah zinglei suimilam 4:00 hrawng i an rak luh ruang ah atu bantuk in an tlaih hna hi a si.

“India le Myanmar ram pehtlaihnak hlei kam ah a thli te in an hngah i hlei pawng kulhmi leng in Myanmar ramchung ah a thlite in an rak lut, hihi phungninglo a si caah kan tlaih hna” tiah a chim.

Tlaih a tongmi hna cu Myanmar rammi hringtu a pa U Kyaw Thein i fapa Kyaw Aye Naing (kum 48), Zeyah Thuhkhah lam No.107 sang, South Dagon peng, Yangon le a auhmi hna Bangladesh rammi minung 5 (Bangladesh rammi, Rakhine miphun) an si. Cun, Myanmar rammi hringtu a pa U Thar Htun aungiI fapa Zaw Min Aung (kum 38), Cherry Road, Hleku peng, Yangon ah a ummi nih Bangladesh rammi minung 7 hi Rangamati pengkomh, Bangladesh ram i khua a sami an si.

Phungninglo in a rak lutmi Myanmar rammi pahih le Bangladesh rammi 12, an zapi minung 14 cu ahmuh (case) tuahnak ding caah Khah-lah-yah (228) battalion in tat-yin-hmu a pahnihnak bohmugyi Than Htun Aung, lahwahkah zung lutlai U Tayza Lin le Rihkhawdar palek sakhaan bawi Zaw Zaw Kyaw nih chekhlatnak an tuah i Rikhawdar palek sakhaan ah an chiah chung hna tiah theih a si.
Ref: Rihkhawdar IRPD

Na ruahning rak langhter ve.. (Leave a comment)

%d bloggers like this: