Chin ramkulh ah Industrial zone (စက်မှုဇုန်) kan dirh lai tiah SAC hruaitu nih a chim

0

The Chinland Post | 2022 September 29 – Chin ramkulh ah Coffee, Wa-uh, sia hna hrambunh in Industrial Zone (စက်မှုဇုန်) kan dirh lai tiah General Min Aung Hliang nih a chim.

Cu kong he pehtlai in Chin ramkulh Minister hlun Salai Isaac Khen nih General Min Aung Hliang a chim mi hi lih a si i ramkhel daihnak a um khawhnak hnga a phi a kawl hmasa a hau tiah a chim.

“Ramchung daihnak um loin zeihmanh tuah khawh a si lo. Ramkhel daihnak a um khawhnak hnga a phi a kawl hmasa a hau. Cu bantuk in tuahnak nawl a ngei lo” tiah Chin ramkulh Minister hlun Isaac Khen nih a leh.

A luancia September 27, Naypyitaw ah an tuahmi SAC meeting ah General Min Aung Hliang nih Chin ramkulh chungah Coffee, Wa-uh le sia a tam caah cu hna hrambunh in Industrial Zone dirh in sipuazi tuah uh tiah Chief Ministers pawl kha a chimh hna.

SAC hruaitu nih a chim mi hi NLD cozah chan lio Chin ramkulh MSMEs program ah ṭha tein rak ṭial cang mi a si i 2021 i cozah thar a kai tikah 2021-2025 karlak Chin ramkulh ṭhanchonak caah tuah ding in rak i ruah cia mi a si tiah Salai Isaac Khen nih a chim.

“Zeihmanh khi tuah hlei mi a um lo. Kanmah chan lioah keimah pumpak in 2017 ah a si khawh le si khawh lo kan rak hlathlai. Wa-uh cu a tlamtlin caah Kanpetlet, Mindat le Matupi hna ah tha kan rak pek. A chuah ṭha fawn. Coffee cu Tedim, Tozang ah Laitlang Coffee tiah tha kan rak pek. A tlamtling ve fawn. Sia hi cu chim lengmang mi a si ko. Atu lawng ah a theih i si lai cu, a thei lomi pawl kha a hlen hna i a si” tiah Salai Isaac Khen nih Mizzima ah a chim.

Atu bantuk in SAC hruaitu nih a chim mi hi ka zum lo i zeihmanh tuah khawh mi ngei loin hlan chan a kan kirpi ṭhan tiah CDM siangcachim nih Mizzima ah a chim ve.

“A hlan chan sianginn ah hngakchia pawl kha har le fe in Coffee kung, Kyat-su kung an rak cinter hna nain zeihmanh a ṭhahnem lo. Abiana ah, Coffee kung cin cu hei tuah kho ko seh, Sia hnuk din ding cu a si kho lo. Chin ramkulh ah Sia hnuk a ding mi an har. Zeihmanh tuah khawh mi um loin caan dihter kha a duh i a si” tiah CDM siangcachim pakhat nih Mizzima ah a chim.

SAC hruaitu nih ramṭhen le peng zapi ah Industrial Zone dirh ding in bia a cah hna i Chin ramkulh hi a tang mi a si tiah a chim.

About The Author

Na ruahning rak langhter ve.. (Leave a comment)

%d bloggers like this: