Chin Ramkulh Ah Inn 46 A Kang I Minung 3 An Thi

Salai Cung Cung|2019 March 21| 2018 January 1 in 2019 March 21 tiang Chin ramkulh ah inn 45 a kang cang i minung 3 an thi  tiah Chin ramkulh meithat zung in kan theih.

“Meithat zung lei in harnak tete a ummi cu pakhatnak ah kannih hi tlangcung mi kan si caah ti lei hi tlawmpal cu harnak a um pah ko nain tu cu timit ti a ngah cang caah kan tlamtling ngai cang. Pahnihnak ah inn kanghnak a chuah caan ah mipi lei nih bawmh lo in an mah le phone in vedio thlah le cun lamkam ah an Cycle pawl  chiah i khat lei khat lei a kal mi an tamtuk. Meithah tik ah bawmhtu si lo in hnahnawhnak petu ah an si tawn. Mipi lei zong nih mah le ti khawh tawk tein an kan bawmh ve ah cun rianrang deuh in mei zong kan that kho lai. Mei kangh aa thawk hi meifa tein aa thawk mi a si caah mah le inn cio ah mitatbu i chiah khawh ah cun Mei a thawh cangka tein an thah khawh lai” tiah Chin ramkulh meithat zung in Deputy Director U Kyaw Kyaw nih The Chinland Post ah a chim.

2018 January in 2019 March 21 tiang Chin ramkulh pengkip innkang cazin cu a tanglei bantuk an si.

Hakha peng  ah inn kanghnak voi 9 a cang i sianginn pakhat telh chih in inn a kangmi zapi 10 a si. Inn tambik a kangh caan hi 2018 May 31, Dawrthar sang ah inn pahnih a kang, minung pa 3 an thi i pakhat aa hliam.

Thantlang peng ah inn kanghnak voi khat a chuak i inn pakhat a kang. Inn kanghnak cu 2018 March 15  Thantlang peng Hmawngtlang khua ah a si.

Falam peng ah inn kanghnak voi 5 a cang i inn zapi 13 a kang. Voi khat ah tambik a kanghnak cu 2018 April 16  Falam peng Rihkhawdar ah inn 8, 2019 January 4, Falam peng Lungbang khua ah inn 2 le minung pahnih hliamhma an pu.

Tedim peng ah inn kanghnak voi 6 a cang i inn zapi 7 a kang. Voikhat ah inn pahnih a kangh caan hi 2018 June 30 Tedim peng Lailu khua ah a si.

Mindat peng ah inn kanghnak voi 4 a cang i inn zapi 6 a kang. Voikhat ah inn tambik a kangh cu 2018 November 7 Pikhua ah inn 3 a kang.

Paletwa peng ah inn kanghnak voi 3 a cang i inn zapi 6 a kang. Voikhat ah inn tambik a kangnak cu 2018 May 12 Dochaungwa khua ah inn 4 a kang.

Kanpetlet peng ah inn kanghnak voi 1 a cang i inn pakhat a kang.

Matupi peng ah inn kanghnak voi 2 a cang i inn 2 a kang. Hi inn kanghnak a ruangbik le aa thawknak tambik cu rawlchumhnak coka mei in a si. Cun electric mei le daithlang ruang zong ah a si tiah Chin ramkulh meithat zung cazin in kan theih.

Na ruahning rak langhter ve.. (Leave a comment)

%d bloggers like this: