Chin ramkulh ah kahdohnak a fak, minung 2,000 leng zaam a si

The Chinland Post | 2022 June 15 – Chin ramkulh, peng cheukhat hna ah June 9 thok in kahdohnak a chuak i SAC ralkap le Chin mipi hriamtlai phu hna karlak ah kahdohnak a chuah lengmang caah Kanpetlet khuami 2,000 leng an zaam tiah khuami hna nih RFA ah an chim.

Thlanglei Laitlang, Mindat peng, Pukun khua ah hmunhma a khuarmi SAC ralkap cu June 13 zaan sml 8:00pm hrawng in CDF-Mindat nih an kah hna i June 14 tiang kahdohnak a peh tiah CDF-Mindat nih a thanh.

June 14 zinglei sml 7:00am zongah Mindat khua luhnak gate cu CDF-Mindat nih an kah hna caah SAC ralkap cheukhat an i hliam i zinglei sml 9 hrawng zongah Mindat khuachung SAC zung pakhat pawngah kahdohnak a chuak i SAC ralkap 3 an thi i 5 nih hliamhma an tuar tiah theih a si.

Kanpetlet khua zongah SAC nih thazang tampi in kahdohnak a tuah caah CDF-Kanpetlet battalion 2 sakhaan zong zaamtak a rak si.

June 13 ah thazang tampi in kahdohnak a tuahmi SAC ralkap pawl cu June 14 zinglei ah Magway ramṭhen, Kyaukhtoo lei ah an kir ko nain a pawngkam khuate 13 in mipi 1,000 hrawng cu ramtang ah zaam dih a si caah eidin lei harnak kan tong tiah minlanghter awk a ṭha lomi 1 nih RFA ah a chim.

A luancia June 12 zongah Chin ramkulh, Tedim khua ah SAC ralkap kahmi hriamngan ruangah biakinn telh in mipi inn 15 a rawk tiah theih a si.

Tedim khua ah hram a bunhmi Infantry 269 nih hriamngan in a kah lengmang caah zaanlei sml 4 hnu cun leng chuah ngam a si ti lo tiah khuami 1 nih RFA ah a chim.

June 13 zaan sml 10:00pm zongah Chin ramkulh, Falam khua, No.2 B.E.H.S pawngah bom a puak i SAC ralkap pawl nih meithal zong an puah len tiah khuami hna nih an chim.

Ralkap nih hramhram in uknak a lak hnu ah, Chin ramkulh chungah kaphnih kar kahdohnak ruangah inn le lo a zaamtakmi sing 1 leng an um i ramchung ah a zaammi 50,000 leng le Mizoram lei ah a zaammi 40,000 leng an um tiah theih a si.

 

Na ruahning rak langhter ve.. (Leave a comment)

%d bloggers like this: