Chin Ramkulh ah Peng 9 le Khuapi 11 A Um Cang

Salai SH Lian| Chin Ramkulh chung ah Peng (Township) 9 le Khuapi (Town) 11 a um cang. 2020 June thla tiang ah, Chin ramkulh ah Khuapi a zapi ah 20 a um cang tiah kan theih.

Caan saupi chung ah Chin ramkulh ah Peng 9 a um tiah theihmi a si. Nain, 2020 tiang ah a cozah nawlngeitu lei nih Khuapi sinak an pek chapmi zapi he fonh in 20 a tling cang.

Ramkomh Kawlram cozah hnatlakpi nak in, Chin ramkulh chung ah a ummi Peng Khuapi le Khuapi hna cu a tanglei bantuk in an si;

Peng Khuapi (Township)
1. Hakha
2. Falam
3. Thantlang
4. Tedim
5. Tonzang
6. Kanpetlet
7. Mindat
8. Matupi
9. Paletwa

A cozah lei tawlrel ning ah Peng Khuapi (Township) timi ahhin, a khuapi chung a ummi Sang (Ward) le Khuate a ummi zat in relh chih a si. Tahchunnak ah, Hakha ah Sang (Ward) 8 a um i, Khuate 60 tluk a um mi vialte kha Hakha Peng (Hakha Township) cozah nih nawlngeihnak in a tawlrel khawhmi a si. 

Khuapi (Town)
10. Sami
11. Lailenpi
12. Rezua
13. Rihkhuadar
14. Cikha
15. Khaikam
16. Makui-imnu
17. Waibula
18. Cindwe
19. Hnaring
20. Surkhua

A cozah nih Khuapi sinak a pekmi hna chung in, Sami Khuapi hi Paletwa Peng in a si. Hnaring Khuapi hi Thantlang peng in Khuapi sinak pek tharmi an si. Rezua le Lailenpi Khuapi hi Matupi peng chung in a si. Rihkhawdar le Waibula Khuapi hna hi Falam peng chung in an si. Cikha hi Tonzang peng in a si. Kalaymyo pawngte ah a ummi Khaikam Khuapi cu Tedim peng in a si. Makui-imnu Khuapi hi Mindat peng tang ah a ummi a si. Cun, Cindwe hi Kanpetlet peng in Khuapi pekmi an si. A hnu bik ah, Khuapi sinak pekmi hi Surkhua a si i, Hakha peng in a si.

A cozah nih Khuapi (Town) sinak a pek tharmi hna pawl hi an i dannak cu anmah Khuapi pakhat te lawng a tawlrelmi an si. 

Cun, Chin ramkulh ah cozah lei uknak tawlrel ning in Pengkulh (District) pali a um. Cucu, Hakha, Falam, Mindat, le Matupi hna an si.

Theihternak: A cunglei i langhtermi Peng, Pengkomh, Peng Khuapi le Khuapi tbk. hi a cozah nih hmanmi ning in a tlakning in tialmi a si. Laica tawlreltu simi CACC nih felfai deuh in caihkhanpi ding ah a herhmi a si tiah kan ruah. Cun, hi kan hun langhtermi hi The Chinland Post nih May 22 ah Biahalnak kan rak tuahmi lehnak caah theihtlei kan hun tialmi a si ~ Editor.

Na ruahning rak langhter ve.. (Leave a comment)

%d bloggers like this: