Chin ramkulh ah Thantlang, Kanpetlet le Rezua nih an khuapi an chuahtak
Chinland Post| 2022 February 10 — Ralkap nawlngeihnak hramhram in an lak hnu in duhlonak a phunphun in langhter hnu ah hriamtlaih in dohdalnak tiang a phan i, kum khat a rauh hnu ah Chin ramkulh chung ah peng khuapi (Myone) pahnih le khuapi (myo) pakhat in mizapi nih an khuapi an chuahtak cang tiah theih a si.
Chin Human Rights Organization (CHRO) nih February 8 ah thanhnak a tuahmi ah Chin miphun 30,000 tluk hi Mizoram ah ralzam dirhmun in a phanmi an si tiah Mizoram cozah cherhchan in a langhter.
Cun, nihin tiang ah a tlawm bik khuapi 3 cu khuami an zapi nawn asiloah zapi ti awk in an chuahtak tiah CHRO nih cun a thanh chih.
Hiti khuami nih an khua chuahtak in an zaamnak hmunhma le khuaram ah nunnak a liammi zong an hun tam ngai cang tiah theih a si.
CHRO nih February 10 thanhnak a tuah ning ah, a hnu bik Mizoram ah nunnak a liammi hi kum 89 a upa cangmi nu a si. Mizoram a phanhnak zarhthum lawng a si rih tiah theih a si.
Atu bantukin khuapi ah a ummi lawng silo in, Hakha myone chung Senthang peng ah Bungzung zong hi an khua ning in ramtang ah thuh in khua an chuahtak lengmang tiah theih a si.
About The Author
