Chin Ramkulh Chin Ramkulh Khuanu Khuapa Bu Dirhding Timhtuahnak Ngei

0

Chin Ramkulh Khuanu Khuapa Tonkhawmnak

Chin Ramkulh Khuanu Khuapa Workshop November 27-28

Chin Ramkulh Remdaihnak le Thanchonak kong Ceihhmainak ah Chin Ramkulh pengkip a ummi Khuanu Khuapa tonkhawmnak cu HBA Hall, Hakha ah November 27-28, 2018 an tuah I Hmailei Chin ram thanchonak le a herhning riantuan dingin Chin Ramkulh Khuanu Khuapa Bu dirhding biachahnak an ngei tiah theih a si.

Hi tonkhawmnak ah Chin ramkulh Khuanu khuapa Bu cu mi zei Cozah, Bu kuttang a ummi a si lo I zaalong tein dirhmi bu a si tiah cohlannak an ngei. Hmailei zeitin dah Chin ram thanchonak, remdaihnak, Khuatlang lam le sul thanchonak tbk ah a herhning in Rianngeitu le Cozah he ibawmh in kan kalti khawh hnga ti zong ceihhmainak an ngei tiah theih a si.

Chin Ramkulh Khua nu khuapa bu dirh khawhnak ding caah Committee an dirh i Pengkip in pakhat cio Tonzang in Pu Gin Suan Mung (Tonzang Chairman), Tedim in Pu Kham Suan Mung (Tedim Chairman), Falam in Pu Zung Bawi Pum (Falam Vice Chairman), Hakha in Pu Ral Kham (Asst. Sec), Thantlang in Pu Chan Ham (Member), Matupi in Pu Hla Poe (Treasurer), Mindat in Pu Thang Mang (member) hna thim an si i an hruaitu ah Pu Ral Kham (Hakha khua nupa) thim a si. Tutan ah a rak tel kho lomi Paletwa, Kanpetlet le Township cheu (myokhuai) hmun pa (10) khuanupa dihlak zong pehtlaih ding, phunghram ser ding, Khuanu khuapa hruaitu cazin khomsuat ding zong committee rian pek an si.. Bupi Tonkhawmnak cu 2019 kum ah bupi ton khawmnak tuah than in Bu dirhnak, Hruaitu thimnak le hmailei zeitin dah kar kan hlan lai timi biaruahnak an ngei lai.

Chin Elders’ Community Workshop

Hi ton khawmnak ah Tedim in Pu Thang Pi nih “ Atu bantuk a voikhatnak tonkhawmnak nan kan tuahpiakmi cungah kan I lawm. Tulio Khuanu Khuapa kan cawlcanghnak ah Cozah nih tha a pe lo. Khua te lei lam le sul thanchonak rian an tuan tik, vawlei hmun kongah mipi lei aiawh in kan au tikah do tu bantuk in an kan hmuhmi hi a tha lo ngaimi a si. Khuanu khuapa Hmunkhat ah riantuanti kan cucang.” tiah zapi tonnak ah a chim.

“ Hi bantuk tonkhawmnak kan tuah hi voi 2 Mino caah le a tu Khuanu Khuapa caah kan tuah. Zaukphung ithlennak lamthluan, Remdaihnak le khuatlang thanchonak i Cozah riantuanmi cungah Mizapi lei nih zeitin dah kan bawmh khawh hna lai, kan tuanti khawh lai timi ruahnak he kan tuahmi a si. Zatlangbu kan thawn lawngah remhdaihnak kan tuahmi le zaukphung thlennak hi biatak tein a kal kho lai” Chin Center for Peace & Reconciliation_CCPR Program Director (Peace Support Program) Salai Duh Hu Thang nih biahmaithi chimnak ah a chim.

“Chin Ramkulh Khuanu Khuapa tonnak kan tuahmi a ruang cu Democracy kan van ithlen tikah Kan miphun tummernak le van isersiam in lungnget tein kan kal than khawhnak caah cun Zatlang bu pawl kan thawn hi a biapi ngaimi a si. Cu ti zatlang bu kan thawn lawngah mizapi aw-an kha Cozah nih rian a tuannak ah tampi a bawmh ding a si. Atu ahcun Cozah nih rian a tuanmi paoh a tha zong a chia zong mizapi aiawh lei in autu kan ngei lo. Zatlangbu kan thawn lawngah mizapi lei nih kan herhning in Cozah bawmh, a herhnak ah soisel tbk an tuah khawh lai. Zaukphung zong a nung lai. Khuanu Khuapa bu hi Chin zatlangbu lak ahcun Bochan bik le riantuan kho an si tiin ka ruah” tiah tonnak Tawlreltu CCPR Program Director (CEP) Salai Bawi Uk Thang nih The Chinland Post ah a chim.

Chin Ramkulh Khuanu Khuapa tonnak ah Tonzang, Tedim, Falam, Hakha, Thantlang, Matupi le Mindat upa dihlak le Kanpetlet le Paletwa in Siangngakchia an zapi minung 80 tluk in ton khawhnak hi an tuah a si tiah theih a si.

About The Author

Na ruahning rak langhter ve.. (Leave a comment)

%d bloggers like this: