Chin Ramkulh Chung Ah SAC Ralkap Sakhaan Voi 9 An Lak
The Chinland Post | 2023 September 7 — Hramhram in uknak lak a si hnu, Chin ramkulh chung ah SAC ralkap sakhaan voi 9 an lak khawh tiah NUG Ministry of Defense nih cathanh chung ah a langhter.
A luancia kum 2 chung, Chin ramkulh hmunkip ah SAC ralkap sakhaan lak kahdohnak telh in kahdohnak voi 550 leng a cang tiah theih a si.
Cun Myanmar ram pumpi huap in SAC ralkap sakhaan lak kahdohnak voi 135 a cang tiah cathanh ah an ṭial.
Chin ramkulh chung, SAC ralkap sakhaan lak kahdohnak pawl hi a fiang in NUG nih a langhter lo nain Surkhua sakhaan khanghnak, Vuangtu sakhaan khanghnak, Thantlang khuachung sakhaan laknak, Lungler sakhaan laknak, Mindat Makui-ingnu khua sakhaan laknak, Matupi peng ka-kin sakhaan lak kahdohnak, Falam peng Tibual sakhaan le Vaar sakhaan laknak hna telh in Tonzang Dar sakhaan lak kahdohnak hna Chin ramkulh chung ah a cang.
NUG cathanh chung ah Hakha-Falam karlak Chuncung khua ah CNA le CDF hna bawm in SAC ralkap EE-9 Cascavel Tank 2 an hrawh khawh nak zong kha an telh.
Hriamtlaih dothlennak aa thawk in kum 2 chung ah SAC ralkap lei a thi mi an tam bantuk in Chin hriamtlai phu le khuami hna zong a nunnak a liam mi an tam ve.
Cun SAC ralkap nih Chin ramkulh chung an khangh mi mipi inn hi 1,630 leng a um cang tiah Data for Myanmar nih August thla hramthawk lei ah a thanh.
