Chin Ramkulh Cozah Bu Chung In Minister Pakhat Rian Dinhter An Timh
City Hunter| 2018 May 7| Chin ramkulh cozah bu chung in minister pakhat cu rian dinhter an timh. Rian dinhter ding kong le aho dah rian dinhter a si lai timi cu a rauh hlan ah aa fiang lai tiah Chin ramkulh hluttaw zung in thawng kan theih.
Hi kong he pehtlai in Chin ramkulh Hluttaw Speaker Pu Zo Bawi nih, “Chin ramkulh cozah bu chung in minister riandinhter ding le dinhter lo ding kong cu aa fiang rih lo. Dinhter zong a si kho i dinhter lo zong a si kho. Dinhter a si hmanh ah ahodah dinhter a si lai timi zong a fiang rih lo. A rauh hlan ah mizapi nih biafang nan theih te ko lai” tiah The Chinland Post ah a chim.
“Chin ramkulh cozah bu chung in minister pakhat cu a rian a tei lo caah asiloah a rian a tlamtlinh lo ruang ah a rian dinhter ding in hluttaw nih kan tawlrel. Simanking rian pawl ka tei lo ruang ah kaa din timi a kong sawh in dinhter kan timh. Dinhter dingmi minister min cu chim ka duh rih lo. A result a chuah tikah ahodah a si timi nan hngalh te ko lai” tiah Chin ramkulh NLD haotu le Chin ramkulh hluttaw Speaker a simi Pu Zo Bawi nih 7Day media sin ah a chim.
Chin ramkulh Chief Minister Salai Lian Luai le Chin ramkulh hluttaw Speaker Pu Zo Bawi cu thaizing khi Naypyidaw ah kan kal lai i ca rian dinhternak kong ca an chiah pah lai. Cu riandinhternak ca cu President nih fehternak a tuah hnu May thla chung Ramkomh cozah bu tonpumhnak tuah tikah aa fiang te lai. Khi tikah cun Chinram cozah bu chung lawng si lo in ramkomh cozah bu minister le Chief Minister cheukhat zong an rian thlen nawn an si lai tiah 7Day news cherhchan in kan theih.
Chin ramkulh cozah bu ah Chief Minister telh in minister 6 an um. Cu hna cu; Chief Minister Salai Lian Luai (NLD), Sipin Le Meilei minister Salai Isaac Khen, Lam le Sul lei pehtlaihnak minister Pu Sui Thio (NLD), Thingram le zuatkhelh- cinthlaknak lei minister Pu Mang Hen Dal, Simanking le Tangka lei minister Pu Vui Kaw (NLD), Social Affair Minister Pu Pau Lun Min Thang (ZCD)an si. Minister Salai Isaac Khen le Minister Pu Mang Hen Dal hi mizapi thimmi palai an si lo, mifim tiah a leng in dawh chommi le minister rian pekmi an si.
Hi kong he pehtlai in Chin ramkulh NLD Secretary zong a si i hluttaw Speaker bawmtu zong a simi Pu Aung Taan nih cun, “Chinram minister riandinhternak kong cu zeihmanh ka hngalhmi a um lo. Chief Minister belte tuzarh chung Naypyidaw ah a kal lai. Cun, tu thla May 20 hnu ah Chin ramkulh hluttaw tonpumhnak tuah kan timh i a si ko” tiah The Chinland Post ah a chim.
Minister rian dinhternak kong he pehtlai in Chin ramkulh Lam le Sul lei pehtlaihnak minister Pu Sui Thio nih, “Kei cu zeihmanh ka hngal lo, atu hi Naypyidaw ah ka um” tiah The Chinland Post ah a chim.
May 14, Naypyidaw ah ramkomh cozah bu tonpumhnak an tuah lai. Hi tonpumhnak ah ramkomh minister le Chief Minister cheukhat rian thlennak a um lai tiah Naypyidaw ummi cozah riantuantu pakhat nih April 25, 7Day News sin ah a rak phuan bal cang.
March 30, President rian a cohlan ni biakamnak biarocah ah President U Win Myint nih thlennak riantuan a khulnuarmi zung le bu hna cu zohfel le rengh deuh an si lai tiah a chim. Cu pin ah Kumthar biarocah chimnak zong ah thlennek he aa rup lomi riantuantu hna cu a thekvak a tha i a fimmi (quality) hna he thlen herh ahcun kan thlen lai tiah President U Win Myint nih a chimchih.
Chief Minister thlen timhmi hi Pago ramthen, Taningthari ramthen le Kachin ramkulh in an si kho tiah NLD party upa he aa naihniammi pakhat nih 7Day media sin ah a chim. Cu bantuk in April 25 ah thawngpang pakhat a chuakmi cu President hlun U Htyin Kyaw nupi zong a si i atulio Tungkhuah peng in Pyithu hluttaw palai MP Daw Su Su Lwin cu fimcawnnak minister rian an pek lai tiah Kawl media cheukhat nih an thanh cio.
About The Author
