Chin Ramkulh Cozah le Zatlang Mino Bu Pehtlaihnak Kong Ceihhmainak An Ngei
CCYO
Van Bawi Mang| 2018 August 27| Chin ramkulh cozah le zatlang mino bu karlak ah zeitin a fek deuh le a tha deuhmi pehtlaihnak kan tuanchuah khawh lai timi kong he pehtlaih in Chin ramkulh chung um Chin Youth Organization (CYO) le a dang ramkulh ah a um mi Chin mino hna he CACC, Hakha ah August 25 -26 tiang Chin Center for Peace and Reconciliation (CCPR) tawlrelnak in an tuah tiah thawng kan theih.
Chin ramkulh ah mino le ritthaisii, mino le chawlehthalnak, mino le fimcawn thiamnak timi a tlangpi in a nikhatnak ah ceihhmainak an ngei.
“Chin ramkulh lawng si loin Kawlram chung pi in kum 18 tlin lo in zuu a ding mi tampi hmuh khawh a si. Chin ramkulh ah ritthaisi a zuar mi hna hi license ngei lo in a zuar mi tampi hmuh khawh an si. Cucu, mino nih zulhphung (upadi) kha fiang tein hlat ve le biatak tein hi ritthaisi dohnak ah i teltum a herh. Cu nih cun, Chin ramkulh ah zeitin ritthaisi pawl kan doh ning, kan zorter deuh lai ti bantuk kha biatak tein a bawmh lai,” tiah Rev. Ni Cung Thang nih Hakha sining in chim fianhnak a ngei.
Mino le fimthiam cawnnak kong he pehtlaih in atu lio Chin ramkulh ah harnak a um mi fimcawnnak lei in le mino bu nih zeitin rian nan tuan awk a si timi cu a tanglei bantuk in Dr. Tluang Za Thang nih a chim.
“Chin ramkulh ah hin fim cawnnak lei in harnak tampi a um cu mikip nih theih a si. Cu ah cun, saya/mah te tlawm tuk le saya/mah te lila nih an thiam setsai lomi Kawl holh le kawlca in ca chimh hi Chinmi kan caah a har taktak mi as i. A harnak cu tampi a um lengluang ko. Cucaah, Chin mino CYO zong nih cozah he tha tein biaruah le neihniam tein rian nan tuan sicun thatnak a chuak mi cu a um hrim ko lai.”
Hi nihnih chung ceihhmainak an ngeih mi ah hin Sipin Vuanci U Soe Htet le Social Affair Vuanci U Pau Lun Min Thang hna zong nih an telpi kho hna i zeitindah hmailei ah rian kan tuanti lai timi kong le atu lio Chin ramkulh thanchonnak ah a cozah lei in zeitin dah rian an tuan timi hna zong fianh le theihternak an ngei hna.
“Hi bantuk in hmunkip um Chin mino nan i ton khawh cu thil tha tuk mi asi. Hi hnu zong ah pehzulh in Chinmi le Chinram caah izuam chih u. Cun, chim ka duh mi cu; mah le khua, miphun cu daw ko u, tanh ko uh. Sihmanhsehlaw, Chin miphun kan si ti hi cu zeitik hmanh ah philh hlah u,” tiah Sipin Vuanci U Soe Htet nih forhfialnak a pek hna.
“Chin ramkulh a cozah lei in mino thazaang an thawnnak ding ca le hmailei ah lungrual tein an tuanti khawh ding hi kan izuam cuahmah lio a si ve. Cuve ban- tuk in mino lei zong nih cozah kan riantuannak ah kan telpi ve u, kan bawm u. Tahchunhnak ah, motor cycle mongh ning cang le pawngkam thianh hlimnak lei ti bantuk ah mino nih nan kan telpi i kan tuanti a sicun kan Chin ram cu hi nakin a nuam deuh lai i, aa dawh deuh hrimhrim ko lai. Cucaah Chin mino hna nih, a dikmi lamthluan in le mi dang miphun hna nih zohchunh awktlak in na kan dir piak a hau,” tiah Social Affair vuanci Pu Pau Lun Min Thang nih mino le cozah riantuannak ah zeitin kan ipehtlai awk a si timi tlangtar in a chim.
Tutan ceihhmainak ah a kai kho mi hna hi Central Chin Youth Organization (CCYO) timi phu ah aa telmi phu 15 ah phu 12 an kai kho i Chin ramkulh lawng siloin a dang ramkulh um Chinmi Thlado, Asho, Hualngo hna zong an i tel kho. Nihnih chung a kai kho mi hi milu 100 ringlo an si.+++
About The Author
