Chin Ramkulh Cozah Nih Mizapi Sin Ah An Rian Tuan Ning An Fianter
Photo: The Chinland Post
Salai Cung Cung |2018 November 20| Chin ramkulh cozah le mizapi tonnak cu Hakha Town Hall ah November 19 zing suimilam 10 in zaanlei 2pm tiang an tuah i cozah nih mizapi sin ah an rian tuan ning fianternak an tuah tiah kan theih.
Hi tonpumhnak ah hin CBC USA GS Rev. Dr. Thlaawr Bawihrin zong nih Chin ramkulh cozah sin ah forhfialnak le biahlanak a ngeih hna.
“Mizapi hna cozah hi upat hna usih. Cun an nawl zong zulh ding an si. Zeicatiah Bawipa nih ram uk caah a thimmi hna an si. US ram ah Chin miphun hi 80,000 hrawng an um. Kan hnu kum Indiana ah tanghra awng hi 1030 an si. Cucaah kanmah ramdang ummi le Chin ramkulh cozah i bawm u si law rian tampi kan tuan kho lai i Chin ram zong a thangcho chin lai. Hakha le Falam ah ti har nan timi hi cu a si kho lo. Ramdang ah cun original ti tam an ngeih lo caah thli hmanh ti ah an ser. Cu lio ah kanmah Chinram chung a chuakmi hmanh tlamtling in kan hman kho lo hi cu ruah ah lungfak ngai ko. Democracy cu mizapi thimmi nih hruaimi a si i mah duh paoh in tuah le um kha a si lo, ningcang tein um kha a si. Mizapi nih thimmi cozah nih hin mizapi cung ah dawtnak an ngei maw? Ram dawtnak an ngei maw? Timi biahalnak tuah ka duh hna. Chin ramkulh cozah nan riantuannak ah tlamtling mi um lai, tlamtling lomi zong um lai. Cucaah mizapi he i bawm in tlamtlinh khawh nakding fakpi in i zuam kan herh” tiah CBCUSA GS Rev. Dr. Thlaawr Bawihrin nih tonpumhnak ah a chim.
“Bungzung Miraang vawlei chuahnak sehzung caah a herhmi mei cu Riva ah kan laak lai. Tender zong auh a si cang i November 27 ah a hnu bik tender sok caan a si. Tender a ngahmi nih cozah lei tawlrel ning tein an tuan cang lai” tiah Chin ramkulh Hluttaw Speaker Pu Zo Bawi nih tonpumhnak ah a chim.
“A tu lio Chinram caah Vanlawng tumnak an ser lio mi Falam Surbung tlang Vanlawng tual cu 100% cungah 48% an lim cang. A ralai mi 2020 ah Vanlawng tum kho ding in timhtuahnak kan ngei. Hmailei ah cun Kawlram lawng si lo in Singapore, Malaysia, Thailand, India he hnatlaknak kan ser lai i tlungkal kho ding in timhtuahnak kan ngei” tiah Chin ramkulh Chief Minister Salai Lian Luai nih tonpumhnak ah a chim.
Hi tonpumhnak an tuah cu NLD cozah an kai hnu kumthum dengmang an riantuan ning le rian tuan ding an i timhmi mizapi sin fianternak le mizapi lei nih chimphuannak an tuah a si.
About The Author
