Chin ramkulh cozah riantuannak cu Kawlram ah laanghngan lo bik chang a si

TCP Hakha — Kawlram sipuazi le thanchonak riantuannak kong ah Asia Foundation nih Kawlram ramkulh (7) le ramthen (7) cu dothlatnak (research) a tuah i Chin ramkulh cozah riantuannak cu langhngannak (Transparency) a um lo bik mi chang a si tiah a thanh.

Asia Foundation nih an dothlatnak cauk “Myanmar Business Environment Index – 2019” cu June 5, 2020 ah zapi sin theihternak a tuah i atu bantuk in a langhter.

Cozah riantuannak ah langhngan lo biknak cu Sagaing ramkulh a si tiah a thanh. Chin ramkulh a dih in Taningthari, Mandalay, Irrawaddy ramthen hna le Kayah ramkulh hna hi cozah riantuannak a langhngan lomi pawl an si.

Asia Foundation nih, “Cozah cheukhat cu thancho riantuannak kong ah thawngpang an thuh. Cozah nih aa timmi rian le business kong ah anmah he aa naihniammi lawng thawng an theihter hna. Cu pin ah sipuazi tuahternak zong ah thleidannak an ngei. Anmah he aa naihniammi chungkhar, hawikom tbk lawng vawlei hmunhma le sipuazi tuahnak an pek hna,” tiah an dothlatmi ah an langhter.

“Hi bantuk in sipuazi rian tuannak thleidannak cozah nih an tuah tikah ram thanchonak caah a fawi lo. Minung tleidan in le papek ngeih in sipuazi tuahter chung paoh cu a dikmi thanchonak a chuak kho lai lo,” tiah an langhter chih.

Ramkulh le ramthen in cozah hna nih mah le chungkhar, naihniammi lawng riantuanter (tender pek), thawngtheihter ti bantuk a tuahmi ah Chief Minister an tlaihnak Taningthari hi a zual bik a si. A chang ah Sagaing ramthen, Karen ramkulh le Chin ramkulh nih (4) nak a tlaih.

Chin ramkulh hluttaw Speaker Pu Zo Bawi

Aluancia mi caan ah Chin ramkulh Hluttaw lutlai Pu Zo Bawi zong nih Chin ramkulh cu Kawlram – ramthen le ramkulh vialte lak ah eihmuarnak a tambik nak a si tiah a rak chim bal.

Asia Foundation cu Asia ram vialte ah cozah uknak le upadi nawlngeinak, sipuazi thanchonak, nu thazaang thawnternak, pawngkam thanchonak le ram pakhat le pakhat pehtlainak a cahnak caah rian a tuantu bu a si.

An dirhnak kum 60 renglo a si i Kawlram zong ah 1958-1962 kar zung hun in rian a rak tuannak in cozah nih a ral thawl hna. 2013 kum in Kawlram ah zung an hun than in rian a tuan than tiah kan theih.

Na ruahning rak langhter ve.. (Leave a comment)

%d bloggers like this: