Chin Ramkulh Cozah Vuanci Cheukhat An Thlah Than Cang Hna _ Taingzinghmu Chang Nih Chinram A Uk Lai

TCP-Hakha| 2021 February 1| Kawlram Thimnak 2020 November (8) ah thimfung ningcang lo a um tiah Ralkap lei nih an timi cungah UEC le Pyitaungsuh Hluttaw nih a kan tawlrelpiak lo an ti ruangah Kawl Ralkap nih rampi nawlngeihnak cu February 1, 2021 ah an lak i Kawlram State Councelor Daw Aung San Suh Kyi, Kawlram President U Win Myint telh in Cozah le NLD lutlai tampi tlaih khih an tong.

Cu lakmi ahcun Chin ramkulh Vuancichoh Salai Lian Luai telh in Vuanci dihlak, Chin State Hluttaw Speaker Pu Zo Bawi, Deputy Speaker Pu Teik Thang hna cu Hakha Ralkap Kalaya/266 nih nihin zingka ah an auh hna i Lam le sul Vuanci Pu Sui Thio, Thingram le Cinthlak lei vuanci Pu Mang Hen Dal, Zatlang Vuanci Pu Pau Lun Min Thang, Tangka le Tawlrelnak Vuanci Pu Vui Kaw hna minung (4) cu an thlah cang hna tiah kan theih.

Vuancichoh Salai Lian Luai, Sipin le Chin ramkulh Cozah chimrelnak nawlngei Vuanci Pu Soe Htet, Hluttaw Speaker Pu Zo Bawi le Hluttaw Deputy Speaker Pu Teik Thang le Lahwahkah Vuanci Pu Phwe Arr an zapi minung (5) cu Hakha Ralkap Sakhan Kalaya/266 ah an chiah rih ko hna tiah kan theih.

Ralkap Sakhan ah chiah rihmi hna cu zeitik ah thlah an si lai tiah theih a si rih lo nain thlah cangmi Vuanci pawl cu February 4, 2021 hlan ah nan inn ah nan tin dih lai tiah an ti hna tiah theih a si.

Tlaih a tongmi Vuanci he aa naihniammi nih “ Zingka ah an rak phan I a herhmi a um Ralkap sakhan ah van kan zulta u an kan ti I dai tein kan zulh dih ko hna. Zingka zong chuncaw zong thaw taktak le tha taktak in an kan dangh. Bia an kan ruahmi cu 2020 November (8) thimnak ah ningcang lo in thimfung a um nain UEC le Pyitaungsuh Hluttaw lei nih an an tawlrelpiak duh lo caah nawlngeihnak kan lak hi a si tiah a chim tiin The Chinland Post ah a chim.

Vuanci cheukhat le Ramkulh Zung riantuantu cheukhat cu Ralkap Battalion Commander chang (Ttaingzinghmu) chang nih February 1, 2021 zanlei sang ah meeting a auh hna i Chin ramkulh cu hi uknak chungah amah nih Chin ramkulh Lutlai ka si lai tiah a thanh hna tiin kan theih.