Chin Ramkulh Hluttaw Lakhruak Tonpumhnak An Ngei Lai

Tawk Tling Thang| 2019 February 11| Chin ramkulh hluttaw lakhruak tonpumhnak cu a ralaimi February 14-15 ah an tuah lai tiah kan theih.

Hi kong he pehtlai in Chin ramkulh hluttaw Speaker Pu Bawi Zo nih, “Aralaimi February 13 ahkhin Yeya committee meeting kan tuah hmasa lai. Cu dih hnu February 14-15 ah lakhruak meeting kan tuah lai. MP palai hna zong sawmnak thawng kan thanh dih cang hna. Tutan hi abiapi in RE (Revised budget) budget kong ceihmai le fehter zokzok ding a si caah lakhruak in meeting kan auhnak hi a si. Zeidang biatung ceihmai kan tim lem lo” tiah The Chinland Post ah a chim.

Chin ramkulh hluttaw zungpi saktharmi cu a ralaimi February 20, Chin Miphun Ni zingka ah sunglawi ngai in hunnak tuah an timh. A pawng ah 3 Star level in sak chihmi Chin ramkulh hluttaw guest house cu 2019 January 31 ah thlacamnak in hunnak an tuah cang. Chin ramkulh hluttaw zung le guest house saknak caah ks. 6 billion hrawng a dih tiah kan theih.

NLD cozah thar a kai hnu in Chin ramkulh hluttaw nih upadi 8 le ni-upadi 4 an fehter cang tiah kan theih. Chin ramkulh hluttaw palai hi ralkap palai minung 5 telhchih in an zapi minung 24 an si.