Chin Ramkulh Hluttaw Speaker Hruainak In Hakha Peng Khua 6 Zohfelnak An Ngei
Salai CungCung|2019 June 5| Chin ramkulh Hluttaw Speaker hruainak in Hakha peng Surkhua, Lungkhin, Lungrang, Hausentilak, Dongva, Dinlaupa khua 6 ah zohfelnak an ngei. Hi zohfelnak ah hin cozah zung riantuantu upa pawl zong an i tel tiah kan theih.
“Tutan a biapi in kan tlawnnak cu Hakha peng khua 6 ah a si i cozah zungkip upa tampi he kan kal. An mah le khua cio ah zeidah nan herh mi an um, Ti a har maw, lam le sul a tha maw, Sianginn zeidah a lawh, cachimtu an tling maw, Sianginn saknak le innkhan hna tlamtling maw tibantuk le ngandamnak lei ah nau ngeihtertu sayamah hna an um maw, zeidah an chambau mi a si ti pawl kha khuami hna he tonbiaruahnak kan ngei” tiah Pu Thla Hre nih The Chinland Post ah a chim.
“Hi tonbiaruahnak ah khuami lei nih an herhmi le an chambau mi an chimmi pawl cu, ngandamnak lei siseh fimcawnnak lei siseh anmah le rian cio ah 2018-2019 tangka kum ah cuzat, 2019-20120 ah cuzat tiin budget a tlak ning in kan in tuahpiak hna lai an ti hna. Cun 2020-2021 tangka kum caah budget a tla ding pawl caah an herh mi pawl zong a cunglei ah ca kan in pek piak hna lai an ti hna” tiah a chim chap.
Surkhua ah cozah zung saknak kong pawl le sii-inn pawl, a dang dang zung saknak hmun an zoh, cun mipi he tonbiaruahnak zong Lungkhin, Lungrang, Huaisentilak, Dongva, Dinlaupa ah an an ngei kho tiah kan theih.
Hi khualtlawnak ah a kal kho mi cu, Chin ramkulh Hluttaw Speaker Pu Zo Bawi, Minister Pu Sui Thio, Upadik bawizik Sunny Thang Cung, cozah riantuantu upa 6 le Pu Thla Hre an si tiah kan theih.
About The Author
