Chin Ramkulh In Magway Lei A Ṭum Ṭhan Mi SAC Ralkap Nih Lamcung Um Biakinn le Sianginn Pawl An Hrawh Hna
The Chinland Post | 2023 August 8 — Chin ramkulh Kanpetlet peng, Cinduai khua in Magway ramṭhen, Laungshay lei ah a ṭum ṭhan mi SAC ralkap pawl nih lamcung ah a um mi biakinn, sianginn le mipi inn pawl an hrawh hna i thil an firpiak hna tiah CDF-Kanpetlet, Khonu Battalion sin in thawng theih a si.
July 31 ah SAC ralkap pawl nih Chin ramkulh, Kanpetlet peng, Masatui khua mipi inn pakhat chung ah a thi mi SAC ralkap ruak pawl an khumh hna i inn he an khangh chih hna caah inn pakhat a ciam, August 2 zinglei sml 4:00am hrawng ah SAC ralkap pawl cu Laungshay peng, Swelwecin khua lei ah an ṭum tiah theih a si.
SAC ralkap pawl nih Cinduai lamcung ah a um mi Masatui, Mawchaung, Hlaingdoh khuahlun, Hlaingdoh khuathar, Htankone khua mipi inn pawl an baoh i mipi thilri pawl, sianginn thilri pawl, biaknak thilri pawl an fir tiah theih a si.
Cun lam mei pawl an hrawh, Battery, Solar, kuang, bizu, innchung thilri pawl an hrawh leng ah innzuat saṭil pawl zong an an thah i an ei hna tiah CDF-Kanpetlet cathanh chung ah hmuh khawh a si.
