Chin ramkulh khualipi Hakha ah khualtlawng Bus phih chung a si

Salai Bawi Lian Sang & TCP Hakha | 2020 September 16 — Chin ramkulh khualipi Hakha chung ah a lutchuakmi motor tlungkal cu Covid-19 pulrai vennak ah ti in, 2020 September 15 ni thawk in Khuatlawng Bus cheukhat cu phih chung an si rih tiah thawng kan theih.

Hi kong he pehtlai in Chin ramkulh tlunkalnak (transportation) Lutlai U Saw Myint Lwin nih “Magwe, Mandalay, Yangon ramthen le Naypyidaw lei tlungkalmi khualtlawng motor an phih chung cang. Cu chung in Mandalay le Magwe ramthen ah anmah peng chung khualtlawng mi lawng an onh i ramthen dang le ramkulh dang tlawnnak cu an khar chung cang” tiah a chim.

A bik in Yangon khuachung Lockdown an chiahmi nak in Hakha a rami hna cu luhnak nawl onh an si lo. Nain, Sagaing ramthen cozah nih peng dang ah khualtlawng an kham rih lo caah Hakha ah khuatlawng motor nikhat ah pakhat/hnih an lut kho rih tiah kan theih.

Chin ramkulh cozah nih cun ramkulh chung khualtlawn phihnak taktak cu a um rih lo. Asinain, peng dang nih anmah cio in pehtlaihnak phihmi tete a um caah Chin ramkulh cozah zong nih ramthen cheukhat ah khualtlawn an khar chungnak a si.

Chin ramkulh cozah pulrai runvennak lei zong nih a herh lo tuk ah cun khualtlawn lo ding in nawl a chuah.

Thliri phurmi motor bel cu khuachung ah lutnak nawl kan pe ti hna lo. Ramthen dang in thilri le eidin herhhai an rak phorhmi cu khualeng thilri chiahnak hmun tu ah chiahter an si” tiah Chin ramkulh tlunkalnak lutlai Saw Myint Lwin nih cun a chim.

Nihin tiang ah Hakha motor dinh hmun (Bus Terminal) ah a lutchuakmi cu High Class, Taung Za Lat, Aye Chain, Shwe Lwin Pin, Hakha Mann, Yaw Shwe Pyi, Shwe Chian Deih, Chin Minta, Yawtheihtiang, Chin Taung Tan, le a dang motor hna an si.

2020 September 16 cawn nithumni, zing 8:00 AM tiang ah Myanmar ramchung Covid-19 hrik a ngeimi 3636, le nihin zing tiang zawtnak hmuhmi 134, a thimi 39 tiang an si cang tiah theih a si.#

Na ruahning rak langhter ve.. (Leave a comment)

%d bloggers like this: