Chin Ramkulh Khualtlawng An Karh Khawhnak Hnga Hotel Le Mei Biatak Tein Kan Tawlrel Lai: U Soe Htet
TCP-Thantlang| 2019 January 13| Chin ramkulh chungah khualtlawng mi hna an karh khawhnak ding le chawlehthalnak lei a thancho khawhnak ding caah khual riahbuk le mei a thatnak ding biatak tein kan tawlrel lai tiah Chin ramkulh sipin minister U Soe Htet nih a chim.
“Cu tluk piin kan thangcho rih lo. A tu lawng khualtlawng mi hna kan tawlrel lio a si rih. Chin ram chungah khualtlawng an karh thluahmah nak dingah Hotel le riahbuk sak le khuapi 9 ah mei ngah dih ding in kan tawlrel lai. Chin ramkulh chungah pa khatkhat nih tangka lei bawm/coih tu ding hna um hna seh law khua ram caah tampi hlawknak a um lai” tiah Sipin Minister nih a chim.
Chin ramchung ah min ngei a simi hna Khonumthung tlang tel in mizapi nih zohduh ngai mi, nunphung, thilthuam le zohdawh mi dangdang hna an um caah khualtlawng mi kum dangnak a let hnih in an karh deuh tiah kan theih. Asinain, riahbuk lei a tlamtlin lo nak kong tete zong an um rih caah a tubantuk in Hotel sak le chap an timh hi a si.
“Vawlei pi huap in khualtlawng caah hmunhma aa rem mi chungah Chin ramchung zong aa tel ve. Chin ramkulh cu a thangcho lo nain khualtlawng mi hna caah hmunrem ngai pakhat a si. Khonumthung tlang hi (Trekking Tour) caah ramchung ramleng nih an zoh duh i mi thinlung a la ngai mi hmun a si” tiah Kawlram khualtlawng lei tawlreltu bik U That Lwin Toe nih a chim.
Ref: Mizzima
About The Author
