Chin ramkulh khuapi hna ah SAC nih sianginn an awng kho lo

0

The Chinland Post | 2022 May 31 – SAC nih Chin ramkulh peng 7 i khuapi hna ah sianginn awnding in an i zuammi a tamtling lo tiah CJDC General Secretary Salai Timmy nih Mizzima ah a chim. Nu le pa hna zong nih himnak a um lomi sianginn ah an ap hna lai ti ka zum lo tiah a chim fawn.

Chinland Defense Force hna nih khuapi chung an tlaih khawh rih lo caah SAC nih khuapi 7 i sianginn pawl awn ṭhan aa zuammi hi a si i khuate vialte cu CDF nih an tlaih khawh dih.

CDF nih an tlaih khawhnak hmunhma vialte ah sianginn awn piak an si tiah Salai Timmy nih a chim.

Chin ramkulh peng 9 ah SAC nih Thantlang le Kanpetlet telh loin a dang peng 7 ah sianginn awn ṭhan a si lai tiah a thanh.

SAC nih Chin ramkulh ah sianginn awn ṭhan aa timhmi hi an rianṭuannak a kal kho tiah ramdamg sinah langhter a duhnak le phung chungah ka lut ko tiah langhter a duh i a si tiah CJDC nih May 30 ah a langhter.

“Kanmah sinah SAC rianṭuannak a kal kho tuk ti lo. Fimcawnnak lawng si loin mipi nih herhmi ngandamnak zong zeihmanh an tuah khawhmi a um lo. Cucaah phung kan lut ko timi kha ramdang hmuhter a duh hna caah fimcawnnak hi a hmanmi a si tiah CJDC General Secretary Salai Timmy nih a chim.

Chin ramkulh chung nu le pa hna nih sal fimcawnnak le SAC uknak a kal khawh lonak hnga dohding le Chinram mipi uknak phu nih dirhmi sianginn hna lawngah fale fimcawnter ding in CJDC nih a thanh.

SAC i sal fimcawnnak le uknak a kal khawhnak hnga rian a ṭuanmi Non CDM pawl fak piin a zizut nan si lai tiah CJDC cathanhnak ah an langhter.

About The Author

Na ruahning rak langhter ve.. (Leave a comment)

%d bloggers like this: