Chin Ramkulh Khuapi Hna Ah Vanlawng Tual Saknak Survey Tuah Ding Planning An Suai

0

Salai Elvis| 2019 February 9| Chin ramkulh khuapi a si mi hna Hakha, Thantlang, Tedim, Tonzang le Paletwa khua ah vanlawng tual saknak ding Survey tuah ding in Chin ramkulh cozah nih Planing an suaisam tiah kan theih.

“Chinram chung Vanlawng tual hman khawh colh a si dingmi cu Falam Surbung le Dr. Sa Sa tawlrel nak in Lailenpi vanlawng tual hi 2020 kum ah vanlawng tum kho dingin timhtuah a si. Cun Paletwa, Hakha, Thantlang, Tedim le Tonzang zong Survey tuah dingin Plan kan suai. Survey tuah hnu ah Budget he aa tlak ningin ruah a si lai. Chikkhat ah tuah dih tiah cun rampi cozah lei zong nih Budget an kan pek khawh lai lo pin ah ramkulh cozah budget zong in tuah khawh ding a fawi lo caah duhsah tein tuanchuah ding kan timh hna” tiah Chin ramkulh cozah chimnak nawlngei tu Sipin vuanci U Soe Htet nih The Chinland Post ah a chim.

Paletwa vanlawng tual a hlun zong tuanchuah dingin sipin vuanci pumpak nih February thla thokka ah a rak zoh bal tiah kan theih.

“Paletwa vanlawng tual zong 1978-1984 kum hrawng sianginn ka kai lio ah a rak tum bal. Kyaut-htoo khua pawng ah vanlawng a rak tlaknak in Paletwa vanlawng tual cu an rak ngol. Cu vanlawng tual a hlun zong kan zoh i a tungvang hi pe 1700 x 300 hrawng a si. Cuka hmun lila ah cun pe 10,000 tluk cu aa kauh chap kho rih ding a si. Hi vialte kauh chap khawh ah cun vanlawng fa mi le a laifang pawl cu an tum kho dih lai. Cucaah Chin ramkulh cu lam le sul a that lo caah hi vialte khua hna ah vanlawng tual duhsah, duhsah in kan tuah khawh a si ah cun fawi zaang ngai in le vanlawng in i tlawnkai a si lai. Vanlawng tual cu a hlun zong kan zoh lai i a thar zong kan zoh lai” tiah sipin vuanci nih a chim.

About The Author

Na ruahning rak langhter ve.. (Leave a comment)

%d bloggers like this: