Chin ramkulh May le June thla ah Chin mipi le mipi hriamtlai 36 an thi
The Chinland Post | 2022 July 6 – Chin ramkulh, a luancia May le June thlahnih chungah Chin mipi le mipi hriamtlai 36 an thi i hma a pumi a tlambik 10 le tlaih a tongmi 17 an si tiah Institute of Chin Affairs nih a langhter.
Cuchung ah, SAC ralkap nih thahmi leng ah kahdohnak le bom ruangah a thimi zong an um tiah Institute of Chin Affairs rianngeitu nih RFA ah a chim.
Chin ramkulh, Tedim khua, a luancia May 21 ah lai meithal bei in ram vaihnak in a rak kirmi mino 2 cu SAC ralkap pawl nih an rak thah hna.
A luancia June 29, Mindat ah hram a bunhmi Infantry 274 nih kahmi hriamngan ruangah Madat khua kum 14 hngakchia zong a rak thi.
Cun, June 16 zong ah, Mindat peng Masatui khua ah SAC ralkap nih kahmi hramngan a puak i lo rian a ṭuan liomi pa 2 le nu 1 an thi i inn 9 a rawk tiah theih a si.
Kanpetlet khua zongah a luancia May thla dongh ah kum 20 luan hngakchia pakhat cu SAC ralkap nih an tlaih i an rak thah.
May 14 Hakha khua ah Daw Hung Hoih le Daw Aye Aye Maw zong CDF hnatlaknak ca pawl internet cungah nan langhter tiah an puh hna i an rak tlaih hna.
Kanpetlet khua May thla chung lawngah CDM a tuahmi ralkap pawl nan bawmh hna tiah minung 7 an tlaih hna i June thla ah 1 an tlaih tiah theih a si.
SAC biachimnak nawl a ngeitu Major-General Zaw Min Htun nih cun atu bantuk in mipi an thihnak hi CDF, PDF pawl nih dingrep ngei loin bom an hman ruangah a si tiah RFA ah a chim.
Sihmanhsehlaw CDF Mindat biachimnak nawl ngeitu nih cun “Kan nih kan ṭuanmi cu hramhram uknak hrawh ding le kan innlo humhim kha a si. Ralkap nih innlo an khangh, mipi an kan thah i kanmah CDF, PDF an kan puh ṭhan. Hibantuk hi ralkap thiltuah ningkhel te a si. Kanmah ruangah mipi hliamhma a tuarmi le a thimi an um rih lo” tiah RFA ah a chim.
SAC nih raltuknak lei sualnak a buar bantuk in Chin miphun kan dirhmun zong a tlerhkhawn tiah CHRO Second Executive Director Salai Za Uk Ling nih RFA ah a chim.
“Bom hmanhnak le phungning loin mi thahnak pawl hna hi Chin miphun kan dirnak a tlerhkhawngtu thil an si. SAC thiltuah vialte hi sual buarnak a si bantuk in kan miphun dirhmun a tlerhkhawngtu a si tiah ka ruah”.
Chin ramkulh kahdohnak ruangah innlo zaamtak in a ummi ralzaam sing khat deng an um i ramchung a zaammi 50,000 leng le Mizoram lei a zaammi 40,000 leng an um.
Hramhram in uknak lak a si hnu kumkhat leng caan chungah Chin miphun 304 an thi cang tiah Institute of Chin Affairs nih a thanh.
About The Author
