Chin Ramkulh Mei Ngahnak Caah Italy Cozah Nih Euro Nuai 30 A Cawih

TCP-Hakha| 2019 May 1| Miphun electric mei ngahnak rian tuanchuahnak caah Italy cozah nih Chin ramkulh electric mei ngahnak riantuannak caah euro nuai 30 (30 million) a cawih tiah Cinthlaknak le zuatkhalhnak ministry zung in tuanvo ngeitu lutlai Dr. Tun Lwin nih May 1 Myanmar Times ah a chim.

“Chin ramkulh he aa pehtlaimi hmunhma caah hi tangka cu kan hman lai. Rian tuanchuahnak hmun an then tinak a si” tiah Dr. Tun Lwin nihcun a chim.

Hi tangka cawihmi caah Italy cozah aiawh in Myanmar kongkau Italay ambassador Ms. Alessandra Schiavo le khuate thanchonak zung in General Director U Khant Zaw nih April 30, Naypyidaw ah min an thut.

Khuate thanchonak zung nih ma-ha-dat-aa line a  ngah lonak (off-Grid) hmunhma ah a ummi khua pawl kha electric mei an hman khawhnak caah World Bank tangka cawihmi US$ nuai 90 in an tawlrel. Atu Italay cozah cawihmi hi World Bank tangka cawihmi rian hmabang tuanchuah a duh caah a si.

World Bank tangka cawihmi nih atu hi an tuanchuah cuahmah lio. Cu tangka cu Chinram ah hmang ti lo in Italy cozah cawihmi tangka tu an hman cang lai. Hi ka tang cawihmi ngahnak caah ramkomh hluttaw nih 2018 August 13 ah an rak fehter cang.

Hi tangka cu a karh um lomi a si pin ah cham caan hi kum 18 a si ruang ah a ralaimi  2037 lawng ah an chamte lai. A cham caan cu kum 10 chung ah a si lai.

Hi tangka in Chin ramkulh le a pawngkam i a ummi innchungkhar 100,000 tluk nih electric mei an ngah lai i inn hmanmi solar system in innchungkhar 90,000, a fami mei in innchungkhar 6500 mei an ngah kho lai tiah ministry zung nih an thanh.

Miphun Electric mei ngahnak rian a simi 2030 ah khuate zapi mei ngah dih ding cu World Bank tangka cawihmi US$ nuai 400 in 2016-2017 kum in riantuan hram an thawk.

Ma-ha-dat-aa line a ngahnak hmun caah Electric ministry zung nih US$ nuai 310 in siseh, ma-ha-dat-aa line a ngah lomi hmun caah US$ nuai 90 in khuate thanchonak zung nih tuanvo laak in an tuanchuah.

Khuate thanchonak nih simanking rian an thawk ni caan in 2017-2018 kum tiang solar system in khuate 4119 in innchungkhar 200,000 renglo le zapi ngeihmi inn 35,000 caah electric mei ngahnak rian an tuanchuah cang tiah theih a si.

Atu lio 2018-2019 budget a dih tikah inn hmanmi solar in khuate 2400 renglo, a fami mei system in khua 100 hi electric mei ngah dih ding hmuitinh in an tuan cuahmah.

Atu budget kum a dih tikah ma-ha-dat-aa line a ngah lonak khuate um mizapi innchungkhar zapi i zatuak 25% renglo hi electric mei an ngah cang lai i ramkomh minister Dr. Aung Thu nih a cunglei minthutnak puai ah a chim.

Ref: Myanmar Times

Na ruahning rak langhter ve.. (Leave a comment)

%d bloggers like this: