ASEAN bawmhnak chungah Chin ramkulh aa tel lo
The Chinland Post | 2022 June 7 – Ralkap nih hramhram in uknak a lak hnu ah Chin miphun le Chin mipi hriamtlai hna nih SAC cu an doh caah Chin ramkulh hmun tampi cu ralram ah a cang i Chin mipi 90,000 nih inn le lo zaamtak a si.
Bawmhnak a herh tuk mi Myanmar ram cu bawmhnak pek ding in ASEAN nih SAC rianṭuantu pawl he rianṭuanṭinak kan ngei lai tiah May 6 ah a thanh.
ASEAN nih bawmhnak a pek ding hmunhma hna chungah Kayah ram, Karen ram, Magway ramṭhen, Sagaing ramṭhen le Bago ramṭhen hna lawng an i tel i Chin ramkulh chung ralzaam hna ca a tel lo caah atu bantuk in cathanh kan chuahnak hi a si tiah Interim Chin National Consultative Council (ICNCC) in Salai Isaac Khen nih a chim.
“Chin ramkulh an telh lomi hi a taktak a sinning an i theihter lo caah maw a si hnga? Zeiruangdah a si hnga? Chin ramkulh ah a ummi ralzaam pawl covo an i theihter lo a si”
Ralkap nih hramhram in uknak a lak hnu ah Chinland Defense Force le SAC ralkap karlak kahdohnak ruangah Chin miphun ralzaam 90,000 deng an um i ramchung ah inn le lo a zaamtak mi 50,000 leng an um tiah ICNCC le NUG nih June 6 ah an thanh. Ramri lonh in Mizoram ah a zaammi 30,000 leng an um tiah a chim.
ASEAN bawmhnak program ah Chin ramkulh aa tel lo caah ngaihchia le lungrawk ngai a si tiah CJDC thawngthanhnak rianngeitu nih a chim.
“Chin ramkulh ah kahdohnak a chuak i Thantlang khua hna cu khuaning deng in a kaang. Falam lei zong ah Inn 93 a kaangh cang. Chin miphun 100% chungah 30% nih ralzaam dirhmun an phan. Bawmhnak herh tuk a si lioah Chin ramkulh an telh lomi hi cu lungrawk ngai a si. Ngaihchia zong a si. Tlukruannak a um lo tiah ka hmuh. A biapi bik cu ASEAN bawmh SAC sin in a raami hi kan lungtling lo bak”.
Kahdohnak ruangah Thantlang le Hakha kar kalumnak a har tuk i ralzaam ca eidin le sii bawmhnak an herh tiah theih a si.
“Chin ramkulh cu tlangcung hmunhma a si i facang hi nelrawn lei in a rat tikah harnak kan tong ngai. Chin ramkulh chungah ralzaam 50,000 leng um a si. ASEAN nih Chin ramkulh a telh lomi hi cu Myanmar rampi buainak ah Chin ramkulh hi aa tel hnga lo maw tiah ruah awk a um ngai. ASEAN zong nih SAC he ṭuanṭi si loin ramchung NGO, INGO hna he rianṭuanṭi ahcun a ṭha deuh lai tiah chim ka duh” tiah min langhter a awk a ṭha lomi pakhat nih RFA ah a chim.
Kahdohnak ruangah an rak zaam lioah Mizoram khrihfa bu le NGO pawl nih bawmh a si ko nain pehzulh in bawmh khawh a si ti lo ruangah ralzaam hna nih harnak an tong tiah Mizoram ralzaam bawmtu Salai Charlie nih RFA ah a chim.
“A tulio caan ah ramdang bawmhnak kan hmu lo. Mizoram cozah zong nih a kan bawm lo. Kan eidin ding, kan i hruk ding a tlamtlin khawhnak hnga Mizoram khrihfa bu, NGO pawl le Mizoram mirum pawl nih bawmh a rak si. A caan a rauh ahcun an kan bawm peng kho lo. Fur a tla cang i rianṭuan awk zong a ṭha lo. Ruah zong a tamtuk cang”.
Chin ramkulh ah khuapi, khuate pawl mei khanghpiaknak, kahdohnak a chuah rih ruangah ralzaam an tam chin lengmang i ṭha tein bawmhnak pek khawhnak ding hi a herh tuk tiah theih a si.
About The Author
