Chin Ramkulh Ramri Hlanlio A Siningte In Rikhiahpiak Ding An Hal
The Chinland Post| 2019 July 9| Chin ramkulh he aa pehtlaimi ramthen pawl karlak ramri hna cu hlanlio a siningte he langhngante riantuanak in rikhiah le fehter than ding in Myanmar ram langhngannak, tuanvo laaknak le i khinhnak kongkau zatlang hawikomh phu (Chin ramkulh) nih an hal.
Hi phu nih riantuannak kongkau meeting cu July 4-5, Tedim i an tuah hnu ah atu bantuk in an hal hi a si.
“Chin ramkulh he aa pehtlaimi Sagaing, Magwe, Yakhine he pehtlai in ramri kongkau pehtlai in i alnak a um peng, ramri sining map ning cun hlatpi chim lo, 1995 kum lio i map le atu an thlenmi map hi a dang ngaingai te. Hlanlio 1947 kum lio ramri rikhiahmi fiangte in zoh tikah ramkomh cozah, ramkulh cozah, ramthen cozah nih hi thil sining pawl an zohfel than i alhniarnak a ummi kongkau hi an fianter le an tawlrel a herh” tiah tuanvo ngeitu Andrew Tha Tuang nih a chim.
Ramri kong he pehtlai in Chin ramkulh, Sagaing ramthen le Magwe ramthen ah a ummi mizapi kar ah alhniarnak cheukhat a um i miphun buainak tiang a chuahlonak ding ah ramkomh cozah, ramkulh cozah le ramthen cozah nih hlanlio thil sining tette pawl he thate zohfel than in an tawlrel a herh” tiah a chimchap.
Cu pin ah Kalay University nih a ngeihmi phungphai le tuanbia tialnak cauk ahran No.1- Kalay University dirhnak, hmunhma, dal 1.3nak ah, “University cu Sagaing ramthen, Kalaymyo ah a um i ekah 385 a kau. Nichuah lei ah Kalaymyo, nitlak lei ah Tedim peng, chak le thlang ah Kalaymyo a um” timi biatlang hi a dik bak lomi a si.
A dikmi cu; “University cu Chin ramkulh Tedim peng ah ekah 308.56 le Sagiang ramthen, Kalaymyo ah ekah 76.44 aa tel i a zapi ekah 385 a kau” tiin a dikningte in an thlenremh than aherh tiah Myanmar ram langhngannak, tuanvo laaknak le i khinhnak kongkau zatlang hawikomh phu (Chin ramkulh) nih cathanh ah an langhter.
Andrew Tha Tuang nih, “Hihi a lingtalet in a ummi a si caah tuchan ah hi bantuk tuahsernak a ummi hi siangngakchia hna nih an cohlang lo. Kanmah zong nih kan cohlang kho lo. Langhngannak chan ah ceihmainak um lo in hi bantuk an tuahmi hi a tha lo. Cu ruang ah hi kong cu tuanvo ngeitu ramkulh cozah le ramkomh cozah nih felfaite in an tuah ding kan duh. Ralkap nih anmah duh paoh in an tuahmi le ri an khiahmi hi a khupthal leh than kan duh” tiah a chim.
Ref: Khonumthung
About The Author
