Chin Ramkulh Security And Boarder Affair’s Minister Colonel Han Win Aung Aiawh Ah Colonel Thein Tun Aung Riankhinh A Si

Salai Mangpau | September 3, 2023 — SAC nih Chin ramkulh dihlak amah uknak le hruainak tang ah a tuah khawh ti lo nak Chin ramkulh ah Security and Boarder Affair’s Colonel Han Win Aung aiawh ah Matupi hrambunh ဗျူဟာမှူး hlun Colonel Thein Tun Aung cu rianpek a si tiah September 1, 2023 ah SAC lei nih cathanhnak an chuah.

Boarder Affair’s Ministry Colonel Thein Tun Aung hi Chin ram ah ralbawi ဗျူဟာမှူး a rak ṭuan cang mi a si tiah Mizzima Daily nih a chim. SAC nih September 1, 2023 ah Myanmar Ministry zung lei in Security and Boarder Affair’s Minister nih Chin ramkulh, Kayah ramkulh-Karenni, Kachin ramkulh, Karen ramkulh le Mandalay ramṭhen hna ah Minister 5 thlennak cathanh a chuah.

“Boarder affair’s thlennak cu a ruang a um ko. Hmunkhat ah caan sau an um ruang ah a si kho ko. Eihmurnak a tuah maw? An ṭhialnak a ruang cu theih a si lo nain Chinram a um mi Colonel Han Win Aung cu khuachung mipi upa he biaruahnak a ngei pah lengmang. Hlan NLD chan lio Myanmar ram chung ramṭhen, ramkulh ah cozah rianṭuantu tlaih a tong mi an tam. An inn le lo tiang khar piak an si. Chin ramkulh cozah rianṭuan pawl cu tlaih an tong lo. Inn khar piak mi zong an um lo. Hmundang ah a tli/zaammi cu an um pah ko” tiah amah Colonel he naihniam mi pakhat nih a chim.

Chin ram Boarder Affair’s hlun Colonel Han Win Aung cu NLD cozah thar an kai ka 2017 ah Boarder Affair’s Colonel Kyaw Kyaw aiawhtu ralbawi a si. Atu kum 6 a ṭuan hnu ah thlen a tong.

Colonel Thein Tun Aung cu May thla lai, 2021 ah Mindat khua pawng kahdohnak ah a ralkap pawl fak lak te an sungh caah Matupi hrambunh ဗျူဟာမှူ: sinak in an rak dinhter. Atu a tlaunak thla 18 hnu ah Chinram Boarder Affair’s rianpek a si ṭhan hi a si.

“Atu rianpek thar ralbawi Boarder Minister a konglam theih a si rih lo. Hlan Minister ralbawi pa cu khuachung Biaknak kong  he pehtlai in pastor hna he biaruah ti khawh a si. A tak ahcun Boarder Affair’s Minister rian hi Chinramkulh hruainak kong ah nawl a ngeihnak a um tuk lo. A min men lawng a si ko. North Western Commander a changtu ralbawi nih Chinram cozah cu a mah nawlngeihnak uknak tang ah zeizong a um dih”  tiah Chinram kulh cozah riantuan pakhat sin in theih a si.