Chin Ramkulh Thlali Chung ah Motor Le Cycle Khawndennak In Minung 22 An Thi Manh Cang

Salai Cung| 2018 May 3| 2018 kum January in April thla tiang thlali chung ah motor le cycle khawndennak hi voi 43 a cang i hi chung ah minung 22 an thi. Hakha ah i khawndennak a tambik tiah Hakha motor PK zung in kan theih.

“2018 kum thlali chung, Chin ramkulh ah motor le cycle khawndennak (accident) hi voi 43 a cang. Hi chung ah a thimi minung 22 an si i aa hliammi hi 48 an si. Hakha in aa hliammi le a thimi an tam bik. A thimi hna cu; Hakha in 16, Tedim in 9, Mindat in 8, Thantlang in 3, Matupi 3, Falam in 2, Paletwa in 2 an si. Tonzang le Kanpetlet peng cu a thimi an um rih lo” tiah Hakha motor PK zung in tuanvo ngeitu pakhat nih The Chinland Post ah a chim.

Chin ramkulh ah cozah lei nih rikhiahmi cu khuachung ah suimilam pakhat ah khan (meng) 20 in 32 kilometer lawng mongh khawh a si. Mah nak rang in mongh ahcun dantat khawh a si. Hihi mi tampi nih an zulh lo ruang ah atu bantuk in i khawndennak (accident) a tamnak hi a si. Rang tuk in an mongh, zuurit bu in an mongh, daithlang ngai in an mongh. Rang tuk lo, duhsah deuh in an mongh lo ruang ah atu bantuk in i khawndennak a tamnak hi a si tiah Hakha Motor PK zung in kan theih.

“Hi kong ah kanmah motor PK zung tuanvo nganpi kan ngei. Thilri tlamtlin lo ruang ah harnak tampi kan ngei ve. A bik in zapi zulhmi zatlang lampi ah motor nganmi pawl khatlak in an dir ruang ah i khawndennak a chuak khun. Nai hrawng khawndennak a chuakmi tamdeuh cu lamkam ah motor a dirmi kha zuurit bu le rangtuk in cycle aa citmi pawl va pah tibantuk a tam ngai. Cucaah, lampi cung ah daithlang le zulhphung buar in motor ngan a dirmi paoh dantatnak kan tuah cang hna lai. A bik in motor nganmi thilri pawl khi May 15 thawk cun kan tlaih taktak cang hna lai” tiah a biapeh ah a chimchih.

Mizapi nih motor lei zulhphung tuahmi an zulh ve lawng ah i khawndennak a zor deuh lai. Mi cheukhat cu zulhphung hi an hngalh ko bu in an zul duh lo, an buar. Hiti zulhphung an buarmi hi a poi tukmi le i khawndennak a chuahtertu bik an si ti zong tuanvo ngeitu pakhat nih TCP ah a chim

2017 Chin ramkulh chungah motor le cycle accident hi voi 87 a cang i cu chungah tambik a thimi hi Tedim peng in a si i minung 15 an thi. A pahnihnak cu Hakha peng a si tiah Hakha motor PK zung cazin ning in kan theih. +++

Na ruahning rak langhter ve.. (Leave a comment)

%d bloggers like this: