Chin State Chief Minister Nawlpeknak In Kalay In Arak Tlungmi Khual, Quarantine Chiah Loin An Thlah

Salai Ngun San Aung| April 28, 2020| Kalay lei lam cu Hakha Thar mino nih zaanghleicawi in an hngah i April 27, 2020 zanlei suimilam 7:30 tluk ah Kalay in a rak phanmi khual pakhat cu Chief Minister nih rak thlah uh a ti hna caah Quarantine ah chia loin an thlah tiah theih a si.

Hi kongah Hakha Thar mino hruaitu Hniang Bik Hu nih, “April 27 zanlei suimilam 7:30 hrawngah Land Crusher in U Sein Taung timi pa a phan. Lailenpi ah Vanlawng tual cawh rian a tuanmi ka si. Chief Minister nih kan rian kong he pehtlai in meeting a ka auh caah a rami ka si a ti. Facility Quarantine ah na um a hau. Cucu na duhlo a sile tuzan cu hika gate ahhin na riak lai I thaizingah tuanvo ngei cozah upa sinah kan in ap lai kan ti. Cu zong cu a duh lo, amah hi Kawl holh in a holh nain Kawl tak cu a lolo, kanmah Chinmi Kalay hrawng ummi ka lawhter ko. A ratnak zong hi Kalay in a si. Tlawmpal ah Chief Minister PSO pa nih a rak chawnh i nawl chuah cangmi a si i Hakha na phak cang ahcun nawl na zulh hau ko, a silo le Chief Minister chawnh a hau lai a ti. Cun Palek zong nih an rak kan chawnh i thlah awk a tha lai lo maw an kan ti. Kan sang khuabawi kan hei chawnh i a rat in Chief Minister le a dangling he an ichawn lengmang I a donghnak ah Khuabawi pa nih Chief Minister pa nih rak thlah uh a ti i thlah ko ulaw a kan ti. Kan lung a tling lo ngai. Mizei an si hmanh ah nawl cu zulh cio ding a si ko tiah kan ruah, asinain lung nuam lo ngai in kan thlah ko” tiah a chim.

Ngandamnak lei minister Pu Pau Lun Min Thang nih “Hi kong hi zeihmanh ka thei lo. UNICEF in Ko Saing zong nizan ah Hakha a phan i Quarantine chiah a duh lo nain a si kho lo, nawl cu na zulh a hau ka ti i Nah-tah-lah ah Facility Quarantine in a um ve ko” tiah a chim.

Hakha Thar Khuabawi Pu Tawk Lian nih, “Kanmah nih biafiang kan thei ve lo. Htwe Oke (GAD) nih Chief Minister nih rak thlah uh a ti ee an kan ti I kan thlah ko. Chief Minister he kan ichawn lo” tiah a chim.

Ngandamnak lei Minister Pu Pau Lun Min Thang nih, “Tu hi Lockdown ngaingai kan si rih lo caah mi lutchuak kan kham ning hi tlawmpal cu tuaktan deuh I rikhiahmi kan ngeih ah a herh men lai ti zong ka ruat. A ruang cu cozah zung in rianpipa ruangah a tlungkal mi le herh pipa a ngeimi hna kan kham hna i Quarantine I kan chiah hna tikah rianhma a kal lo I lohma vialte a dir dih sual lai ti phan awk a um. Tahchunhnak ah nihin hi Yangon in Ventilator hlut dingah a rak tlung hnikmi an um I cu hna cu Facility Quarantine ah ni 21 cu chiah ding ti hna usilaw mi zeihmanh nih an tlung duh lai lo. Cucaah kan tawlrelning hi tlawmte cu kan tuaktan than deuh a herh ko men lai” tiah a chimchap.

“Hi kan tuanmi rianhi kanmah sang mino te nih zaanghlei cawi in an tuanmi a si i a herhmi caah KMSS bawmh ka hei hal hna tikah Kuttawlnak dur nga, Mask tom nga le tak linh le linh lo tahnak pawl an kan bawmh an cungah kan ilawm taktak. Kanmah Hakha Thar ca rian kan tuan ti zong a si lo, Hakha pi kan himbawmnak dingah kan tuinmi a si. Cun mitku feh le thabaa tein kan fale nih lam an hngah i suimilam cuzat hnu lut ti lo ding tibantuk zong tha tein ca an tar ko caah mi zeipaoh nih cucu zulh cio awk a si. Chief Minister minung an si pek, Hluttaw Chairman minung an si pek ah nawl zulh in kha ti i an kan thlah ter tikah mino zong an thazaang a zor ngaingai. Zan suimilam 6 hnu I a phanmi cu khuachung luh tiloin gate te ah khan riak hna sehlaw a thaizingah cozah lei he an ichawnhbiak hnu ah a herh ning in luh a herhtuk si le an luh ding asi ko. Tu bantuk thil a um hi cu a nuam lo ngai. Cozah nih zeidah kan herh ti zong an kan hngalhpi ding a biapi ngai ngai” tiah Hakha Thar Khuabawi Pu Tawk Lian nih a chimchap.

Hi kongah Chief Minister he a PSO he kan pehtlaih hna nain an phone aa off caah pehtlaih khawh an si lo. April 27 hnu in Hakha khuachungah herh ngei set loin aa chawkletmi le Mask felfai tein aa hup lomi cu dantatnak an tuah hna I a nikhatnak ah minung 32 dan an liamter hna tiah theih a si. Cun zan 10:00 in deilei 5:00 kar hohmanh leng chuah ti lo dingin nawl zong an chuah cang tiah theih a si.