Chinland Club Nih CNA Ralkap Lt. Sui Uk Taantakmi Chungkhar $ 6859  An Bawmh

0

The Chinland Post| 2019 May 13| Chin National Army (CNA) ralkap Lieutenant Sui Uk (kum 35) nih a taantakmi chungkhar hna caah Chinland Club nih US$ 6859 (Kawlram tangka in 10,201,593 hrawng)  bawmhnak an pek hna tiah thawng kan theih.

US ram ummi miphun caah rian a tuantu Chinland Club phu tawlrelnak in CNA ralkap Lieutenant Sui Uk nih a taantakmi innchungkhar bawmhnak pek ding in US ram Laimi umnak state kip ah tlawmhalnak an tuah i an hmuhmi chung in atu bantuk in bawmhnak an pek hna hi a si.

Hi kong he pehtlai in Chinland Club in tuanvo ngeitu Chairman-2 Pu Thawng Hlei Mang nih, “Chinland Club tawlrelnak in US ram state kip Laimi sin ah tlawmhalnak cu CNA ralkap Lieutenant Sui Uk nih a thihtakmi hna innchungkhar bawmh ding in kan tuah. Kan hmuhmi zapi hi US$ in 6859 (Kawlram tangka in 10,201,593 hrawng) a si. CNA ralkap Lieutenant Sui Uk a nupi le a fa caah $5200 (Kawlram tangka in 7,732,987 hrawng) a si. Lt. Sui Uk hringtu a nu caah $1660 (Kawlram tangka in 2,468,606 hrawng) a dangte in kan kuat ve. Nizan ah kan kuat cang hna nain Thantlang Western Union a ngah lo caah thaizing khi Hakha ah an ra lai i an chuah te lai” tiah The Chinland Post ah a chim.

“CNA ralkap hi miphun caah luhlinh le nunthap in riantuantu an si. CNA ralkap an thih tikah rianniam le riansang thleidang lo in a thimi paoh a si khawh chung in bulpek le taantakmi innchungkhar bawmhnak pek ding hi kan i hmaithlakmi a si. CNA kan ralkap hna hi nunthap in riantuanmi an si, an thih tikah zeihmanh lukhawng zong pekmi a um lo. Cucaah, an taantakmi an chungkhar, an fale hmailei an khuasaknak caah zeital thathnemnak a pek lai timi saduhthah he atu bantuk in bawmhnak kan pek hna hi a  si” tiah a biapeh ah chimchih.

Chinland Club nihhin CNA ralkap a thimi hna hi an si khawh chung in voidang zong ah an bawmh lengmang cang hna. Tutan zong hi Chinland Club nih ningcangte in hi bawmhnak ding ah Thawng Hlei Mang, Pu Lal Luai le Salai Ceu Tum tuanvo an pek hna. Anmah tawlrelnak in riantuan le cawlcangh a si tiah kan theih.

Kachin ram ah training kainak in a thimi CNA ralkap Cadet John Biak Tin Lian le Cadet Ram Hngak siseh, CNA ralkap Cadet Mana Phaw siseh, CNA ralkap Kha Paung le Dr. Za Hlei Thang thih lio zong ah Chinland Club nih bawmhnak an rak pek hna. Cu lawng si lo in CNA ralkap siseh, an nupi le an fale sianginn kainak le i zohkhenhnak ca zong ah Chinland Club nih bawmhnak an pek theu hna tiah kan theih.

Lt. Sui Uk fapa

“CNA ralkap Lieutenant Sui Uk hringtu a nu sin ah an kuatmi tangka cu atu hi hlam ding in kan kal cuahmah lio a si. Tuni ah hlam colh kan timh ko” tiah Sui Uk upa Kham Cung Lian nih The Chinland Post ah a chim.

Chin National Army (CNA) ralkap Lieutenant Sui Uk (kum 35) nih a fapa zarkhat tluk te le a nupi cu March 18 zan suimilam 8:00 Hakha sii-inn ah pumsa dam lonak in a thihtak hna tiah kan theih.

Lt. Sui Uk cu Thantlang peng Farrawn khuami Pu Hrang Bik le Pi Ngun Thluai hna i an fanu Mai Ngun Tha Dim he 2017 kum December 18 ni ah a thiangmi thitumnak an rak tuah. 2019 March 12 ni ah Thantlang sii-inn ah nau ngei dingin an ra. Atu a thla tling rih lomi Min Lian Uk te lawng hi fa an ngeihmi a si. Sii-inn in an chuah hnu ah Farrawn khua ah an tlung.

2016 kum lio in pumpak ngandam lo nak ruangah sii-ai aa thlopbul mi cu a dam lei panh ziah mah an ti ko nain 2019 March 18 zan suimilam 8:00 Hakha sii-inn ah a nunnak a liam hi a si. Lt. Sui Uk cu a pa Pu Khua Hram@Khine Maung Swe le Pi Iang Chin hna i an fa pathumnak a si.

1982 kum Hakha peng Phaizawng khua ah a chuak i New Delhi ah B.Th a cawn lio 2011 April 14 ah ram le miphun caah tiin CNA ah a lut. KIA ah Cadet Training zong tlamtling tein a rak kai pin ah a rian a tlamtlinh i upat mi pasal tha pakhat zong a si.

Amah cu Kachin ram raltuknak a tlun in Tluangram CNA camp ah commander siseh, Tedim peng Zimte ah second Commander a tuan lio ah atu bantuk in ram le miphun ah a nun a pek hi a si. A ruak cu Kalay peng Kyarinn lei ah an tlun pi i March 19 ni ah an vui tiah kan theih.

About The Author

Na ruahning rak langhter ve.. (Leave a comment)

%d bloggers like this: