Chinland Club (USA) Chairman Salai Tial Hmung he Biaruahnak
Salai Tial Hmung cu atulio Chinland Club (USA) ah Chiarman a tuan cuahmah lio mi a si. Atulio miphun caah Chinland Club rian a tuannak kong he pehtlai in le timhtuahnak an ngeihmi saduhthah kong ah The Chinland Post nih biaruahnak kan ngeih. Caan tet lak ah miphun le careltu hna zawnruahnak he kan biahalmi a kan leh khawh caah lunglawmhnak tampi kan ngei. ~ Biaruahtu (The Chinland Post)
“Ram pakhat dothlennak caah a herh bikmi cu miphun dawt le tanh (Nationalism) hi a si…” ~ Salai Tial Hmung
The Chinland Post (Post): Chinland Club nan dirh hi zeitik kum hrawng in dah a si le aa thawhkehning a tawifiannak tein na kan chim kho hnga maw?
Salai Tial Hmung (STM): Chinland Club hi 2010 September 10-11 (Saturday) ah Indianapolis, IN, USA ah dirh hramh kan rak thawk.
Post: Chinland Club hi zeidah a si timi, mipi nih kan i fian chin khawhnak hnga theihternak na kan tuah piak kho hnga maw?
STM: Chinland Club cu dothlennak a tuahcuahmahmi CNF ca’h fund kawltubu a si.
Post: Chinland Club ah zeibantuk minung dah chungtel si khawh a si?
STM: Dothlennak tuah a herh ti a theih i chawva in thazaang chuah a duhmi le Pathian a pekmi hna pahrang hmang in kan riantuannak ah tel a duhmi nih telhkhawh dih an si.
Post: Chinland Club a rianṭuanak le fund nan hmuhning tah na kan chim kho hnga maw?
STM: Fund kan kawl ning hi a phun a tam ngai. A bik in Chinmi rian a tuan mi paoh sin ah phaisa va hal hi a si ko. Cu hlei ah, caw hna kan that i kan zuar than. National flag (thantar) le Neckties hna kan tuah i kan zuar than. Hlasaknak (Concert) hna kan tuah.
Lentecelh zuamnak (Tournament) zong a peng/tlang in kan tuahpi hna. Cun 2019 ah Chinland Club Lucky ticket kan tuah. Mah puai ah hin ei/din tampi kan zuar. Kan hmuhmi vialte Chinland Club Financial Department caah kan chiah dih. Tuhi tuah kan in timh than i ticket zong kan zuar liopi si.
Post: Kumkhat ah fund zeizah nan hmuh khawh?
STM: 2020 tanglei ahcun kum khat kan hmuhmi hi $150,000.00 kan hmuh khawh. 2021 hi Bawipa nih phundang deuh in khua a khan piak caah 4 million kan hmuh khawh.
Post: Atu bantuk thawngpang chiat lio ah, Chinland Club nih CNF/A a bawmh ning?
STM: Tulio cu chun/zan it thiam lo le thuthiam loin fund kan kawl lio pi si. Mipi zong nih an lung a tho tuk lio caan si ve. Chawva kan hmuhmi tete cu a herh ning in cunglei kuat peng khi si ko.
Post: Chinland Club nih Lentecelhnak (Sport fundraising) tuah nan timh timi thawng kan theih? Zeitindah tuah nan timh? Khoika dah tuah nan timh? Hodah a tel kho lai? Zeibantuk ruahchannak he dah nan tuah?
STM: Chinland Club lentecelhnak (sport) hi kum khat voikhat kan tuah tawn. Mahhi tinhmi pahnih kan ngei. Ramdang a phanmi kan mino pawl hi miphun le ram kongah zeitindah an lung kan luh khawh lai ti hi a si i puai zongah tampi an chuak kho ve tak. 2019 kan thawk ahcun Chin National Flag ilak u ka ti hna, nain lak dingah an rel lem lo. 2021 mino tete nih an duh ngai i an in lak pah len. Lentecelhnak cu Indianapolis, IN, 2022 July 22-23-30 ah kan tuah te lai.
Chin miphun pumpululh chuih phu (Soccer team) lawng lut an si te lai. Peng/Tlang in kan then hna. Team 16 tiang lawng cohlang an si lai. Tuhi team 8 nih min an pek cang. Hmasa ka langhter cang bantuk khan CNF le Chinland Club riantuannak hi kan mino nih theih ve hna seh ti hi kan in ruahchanhmi si. Cun miphun kong zongah tanhduhnak thinlung an ngei te lai. Rian an tuan tik ah chawva in dothlennak ah an in tel ve te lai tiah ruahchanhnak zong kan ngei.
Mino pawl miphun dawtnak (Nationalism/Nationalist) lungput an ngeih hi a biapi tukmi si. Mah kong hi an lung kan luhter/kan pemhter hna a hau.
Post: Chinland Club i a suttung le hmailei caah nan i ruahchanmi? Siloah, hi kong he pehtlai in, Chinland Club nih hmuitinh nan ngeimi asiloah hmailei ah mah bantuk dirhmun hi phante uh sih ti nan duh mi um maw?
STH: Hi na biahalnak hi a tha tuk! Keimah pumpak ruahnak zong a tam pah lai. Ram pakhat dothlennak ca’h a herh hmasa bikmi cu Nationalism hi pakhatnak a si i mah a hnu zulhtu dingah phaisa hi a si ko lai tiah ka ruah.
Israel ram nihin tiang an dirhkhawh khi anmah miphun ram dang um billionaire pawl nih phaisa a tomtom in an pek/bawmh hna, Hriam thatha an in cawk khawh hna ca’h khuazei ram hmanh nih a teih kho hna lo. Mah an si ning te khi Chinmi kan thlalang ah si ve seh ti ka duh ngai.
Bawipa nih a kan cawisang i vawlei cung ram rumbik ah Chinmi a phan kan tam ngai cang. Kan chawva hmuhnak hi a tlawm ti lo. Israel miphun bantukin kan tuah khawhnak tampi a um ve cang. USA, Canada, Japan, Australia le Europe a phanmi vialte nih kum khat ah $500.00 tho dih usih law Chinram hi independence lakkhawh kan si tihi keimah ka chunmang (vision) a si peng.
Tu kan riantuannak hi kan in har tuk nain Bawipa nih caan a kan serpiakmi a um ko ti hi kan in ruahchanh peng rih. Minung kan um, Riantuanmi kan um. Phaisa an ngei ngai cang. Dollar million a ngeimi an um len cang. A taangmi cu kan ngeihmi chaw hi ram le miphun ca pek lawng a si cang ko.
Chawva pek caan a phan te lai. Kan fa/nau hna miphun tanhduhnak lungthin an ngeih caan a phan te lai. Kum khat 20 million chuahpi kho u si law independence cu kan kut chungah a um cang tinak a si cang. Cu hlei ah ramdang um nih Chinland hi kum 10 chungah Switzerland bantuk kan tuah khawh lai.
Post: Chinland Club a ṭhawn khawh chinchinnak hnga mipi sin biacah na duhmi?
STM: Chinland Club a thawn hi miphun zalawnnak caah a herh bikmi bu pakhat kan si. Chinland le Chin miphun nih a herh bikmi phu a si. Chinland a himnak caah, Chin miphun luatnak caah main point pakhat a si. Cu ca’h ram thangchonak a phan cangmi pawl nih Chinland Club phaisa hi thawh dih khawh i zuam hna usih ti bia cah ka duh ko hna.
Chin vialte miphun dawtnak/tanhnak (Nationalist/Nationalism) ngeih loin ramkhel (political) riantuan hi tih a nung politician an si kho. Khat lei in kan chimh ahcun politician nih Miphun a tanh lo ahcun hlawhtlinnak a um lai lo.
Cu ca’h Miphun le ram kan sersiam lai ti ahcun dawt lawng in a za lo. Kan miphun sinak hi a tanh in kan tanh chih lawngah hlawhtlinnak kan hmuh lai. Teinak cu lungsau tein kan tuan lawngah kan hmuh lai. Kan dihlak Bawipa bochanh bu in kan ram le kan miphun caah hmai nor chin ko usi law.#
About The Author
