Chinlung Chuak Artist Nih An Sak Thanmi “WE ARE THE WORLD NIH” Vawleipi A Cul

0

Chin Tube nih KINGS & PROPHETS he i bawmh in an tawlrel i ‘Chinlung Chuak Artist’ tiah minbunh in Chin le Mizo hlasa minthang hna nih an sak chin mi ‘WE ARE THE WORLD‘ nih vawlei pumpi a cul. Vawleicung ram tampi in hla lei kong ah zohthannak a tuahtu Vlogger le Youtuber minthang tampi nih REACTION an pek.

Cu a pe mi hna ram ah American, The Philippines, Japanese, Cambodian, Indonesian, Indian, Africa le ram dangdang hna an i tel.

Chinlung Chuak Artist in ‘WE ARE THE WORLD’ a sa chin mi ah aa tel mi hlasa minthang hna cu Amtea, Atea PB (Boomarang), Benjamin Lianpi, Benjamin Sum (Guys From Chin), Betty Mang Hlei Tial, Biak Hlei Par, David Lai (Guys From Chin), Elena Hniang Tha Par, Emily Ngun Hlei Sung, G’nie, Henry Varte, Honey Khuaitizu, Jenevy Sui, Lian Lian, Liandingpuii, P Thawngbawi (Guys From Chin), Rebecca Lallawmsangi, Rema (To Coda), Sangtei Khuptong, Shinbia, Van Hlei Sung, Vari Varte, Yellow Muzik, Zoramchhani, Zorema Khiangte le To Coda Band hna an si.

Vawleicung in a rak zohtu hna nih, “An hlasak mi an thiam, ARRANGEMENT an tuah mi a tha, an tamhmawih mi aa dawh pin ah RAP an telh mi pawl an maak tuk” tiah an thangthat hna.

Hlasak an thawk hlan ah Elena Hniang Tha Par nih hla an sak hnawhchanhnak le nihin Kawlram kong biachimhnak a vun ngeih hmasa.

A bik in Kawlram nih kan temtuar mi kong vawleicung hmuhsak an duh mi a si caah a zohthantu (Reaction petu) Vlogger le Youtuber hna nih Kawlram kong an kan tuarpinak an langhter. Hi hla nih Kawlram kan sinning kong vawleipi le miphun dang tampi thawng a theihter hna. Vawlei pumpi a hninh. Hi hla nih a hninh chinchin te lai.

Kanmah a tuartu zong nih vun ngaih ah kan mitthli a ha. A thar in miphun caah nunnak a liam mi, ralzam in har kan tonning le kan temtuar ning ruah than ah hnaknoruh a runh dih. Ngaih a chia. Lung a kuai.

Chinlung Chuak Artist hna nih an ziathiamnak hmang in an sak mi ‘WE ARE THE WORLD’ hla nih Chin le Mizo hlasak kan thiamnak, miphun pical kan sinak le mi menmen kan si lonak an langhter. ‘Kawlram kong hngalhnak ah hla mual a ngeihnak le a thazaang thawnnak an langhter chap.

Ram kip in a rak zohthantu hna nih ‘Kawlram caah thla kan in campiak hna, zalonnak le daihnak hmu hram uh’ tiah an saduhthah an phuan.

A bik in Chinlung Chuak Artist nih an thiamning le an aw-rau that ning le an quality a san ning faakpi in an thangthat hna.

Pakhat pa nih, “Original nakin ngaih a nuam deuh a ti.” A dang pakhat ve nih, “Michael Jackson nih ngai ve sehlaw aa lunghmuih tuk lai,” tiah a ti ve.

A dang pakhat thiam nih, ‘tah lo in ka um kho lo. Mit thli a luang ko, an hlasak ngai ah. Kawlram caah thla kan in campiak hna a ti.” “Zeitin dah hi tluk a thiam mi Chinlung Chuak Artist hi ka rak hngalh bal lo, hi hnu hla an sak than a si ahcun thawng ka thanh uh” tiah dang khat lei nih a rak ti ve.”

Vlogger le Youtuber nih Chinlung Chuak Artist REACTION an tuahnak a zohpiak tu hna hi sing hnih (200,000) tluk a phan hna an um len cang.

Chin Tube nih “WE ARE THE WORLD” an sak than mi cu 3 February 2023 ah a thlah i nihin tiang ah minung sing kua (900,000) leng nih an zoh cang. Tlawmpal ah a nuainuai in a phan lai.

Vlogger hna le Youtuber hna nih zohfelnak an tuahpiak hna hnu in nikhat ah sing khat (100,000) tluk in Chin Tube ah a rak zohtu an karh ti khawh a si. Hi hnu ah a karh chinchin te lai.

WE ARE THE WORLD hi King of Pop tiah an timi Michael Jackson le Lionel Richie nih Africa ram hartong mi tuarpi nak ah an rak phuah mi a si i 1985 kum ah an rak sak.

Hi hla cu vawleicung ram tampi nih an sak chin than ve. Vlogger le Youtuber tampi nih, “Chinlung Chuak Artist” hna sak than mi hi an thiam bik tiah an thangthat hna.

A tawlreltu Chin Tube thawng le Chinlung Chung Artist nih sak mi “WE ARE THE WORLD” thawng in Kawlram mipi kan temtuarnak cu vawleipi nih kau deuh le thuk deuh in an kan theihpi cang. Chin le Mizo kan picalnak le kan ziathiamnak zong an kan theihpi deuh cang.

Chin le Mizo nih kan zaihla in kan MIPHUN vawlei kan culter cang. An kan theih chinchin cang. Kan awzia nih kan miphun cawisang chin sehlaw, kan ram zalonnak le luatnak caah thazaang tha mi hriamnam si ter chin ko seh.

Hi hla tawlrelnak ah aa telmi dihlak kan in upatnak. Nan retheihnak Pathian nih thluahchuah ko seh.

Vlogger le Youtuber pawl nih an zohfel thannak (REACTION an tuahnak) LINK cheukhat a tanglei ah kan vun thil chih.

About The Author

Na ruahning rak langhter ve.. (Leave a comment)

%d bloggers like this: