Chinram Ah H1N1 Zawtnak Ngeimi Pahnih An Hmuh Hna Timi Biafiang A Si Rih Lo: Minister Pau Lun Min Thang

Salai Elvis|2019 September 2| Chin ramchung ah (Influenza A H1N1 pdm09) zawtnak ngei mi minung 2 an hmuhchuah hna timi thawngpang cu a tu nitiang phungning in thawngthanhnak a um rih lo caah biafiang a si rih lo tiah ngandamnak le zatlang lei vuanci Pu Pau Lun Min Than nih TCP ah a chim.

Hi kong he pehtlai in Kawlram chung phungning in thawngzamh ca cheukhat hna nih Chin ramchung ah H1N1 zawtnak a ngei mi minung 2 an um tiah ngandam nak le hi zawtnak thlopbulnak kongkau tuanvo ngeitu hna nih thawngthanh nak an tuah tiah thawngpang an zamh cio hna.

Minister Pau Lun Min Thang

“Hi kong cu Official report a chuak rih lo, a si nain ruah lo piin khuacaan nih a chuah pi mi zawtnak nih cun a phak hna, cu hna cu ramri lei deuh a si mi Tonzang le Tedim lei ah a cang mi a si. Cucaah mizaw hna cu H1N1 zawtnak an ngei ko timi thawngthanh nak (report) a um  rih lo caah biafiang a si rih lo. A tu lio hi siizung ah a it lio mi, mizaw zong an karh ngai.” tiah vuanci Pau Lun Min Thang nih TCP ah a chim.

2019 January in August thla tiang cazin ningah H1N1 zawtnak hrik ngei maw, ngei lo timi chekhlatnak cu minung 1511 hna sin ah tuah a si. Cu chungah zawtnak hrik ngeimi minung 644 le a thimi minung 106 an si cang. Mah zawtnak cu kum 15 in 65 sin ah zatuak 56, kum 1 in 5 sin ah zatuak 15, kum 65 hna sin ah zatuak 9, kum 5 in 15 sin ah zatuak 13 le kum 1 tang sin ah zatuak 7 tiin zawtnak nih a tlunh duh hna tiah ngandamnak zung nih thanhca an chuah.

Hakha sii-inn pi

Khua caan nih a cuah pi mi H1N1 zawtnak a thimi hna chungah Yangon ramthen in 68, Irrawaddy ramthen in 13, Pago ramthen in 10, Sagaing ramthen in 4, Mon ramkulh in 3, Magway ramthen in 3, Rakhine ramkulh ah 2, Kachin ramkulh ah 1, Shan ramkulh chaklei in 1 le Thaningthayi ramthen in 1 tiin an thi cang.

Leave a Commnet

%d bloggers like this: