Chinram Ah HIV Zawtnak Ngei Mi 122 An Si I Tedim Peng A Tambik

Salai Cung Cung|2019 July 24| 2018 kum Chin ramkulh chung ah minung 36285 chekfelnak an tuah hna i minung 122 nih HIV zawtnak hrik an ngei. Hi chung ah Tedim peng in HIV zawtnak hrik a ngeimi an tambik tiah Chin ramkulh ngandamnak zung in kan theih.

“Hi HIVzawtnak hrik a ngeimi hna cu sii-inn chung lawng ah si lo in a lenglei MCH tibantuk cozah ngandamnak zung he aa pehtlaimi cazin pekmi zong aa tel chih” tiah Chin ramkulh ngandamnak zung in Dr. Sharon Par nih The Chinland Post ah a chim.

HIV zawtnak hrik chekmi le a ngeimi hna cu; Hakha in minung 4822 chung ah 22, Thanltang in minung 2116 chekmi chung ah 4, Falam in minung 3442 chekmi chung ah 12, Tedim in minung 9540 chung ah 42, Tonzang in minung 1409 chung ah 17, Matupi in minung 2572 chung ah 7, Mindat in minung 5080 chung ah 13, Kanpetlet in minung 1403 chung ah 2, Paletwa in minung 4042 chung ah 1 nih HIV zawtnak hrik an ngei tiah Chin ramkulh ngandamnak zung cazin ning in kan theih.

Chin ramkulh chung ah HIV zawtnak hrik ngeimi a tambiknak cu pakhatnak ah Tedim le pahnihnak ah Hakha a si. Chin ramkulh chung ah HIV zawtnak hrik a ngeimi zapi cu minung 122 an si i ngakchia pakhat le a tamdeuh hi upa lawng te an si tiah kan theih.

Leave a Commnet

%d bloggers like this: