Chinram Ah I Paih Ding Ka Tihmi An Um Lo: Mang Thawng Lian
Salai CungCung|2019 May 13| Avoi 1nak Global Zophei Seminar paih ah Zephai khua in Champion a cotu Mang Thang Lian nih Chin ramkulh chung ah paih cu a ka tei mi an um ko lai nain i tlaih ding ah cun ka tihmi an um lo tiah a chim.
“Tu bantuk Zophei paih ah Champion ka co cu a pakhatnak ah Pathian min ka thang that. Cun ka nu le pa le paih a ka chimtu, ka hawile thazaang a ka petu le paih tawlreltu cung ah lunglawmhnak tampi ka ngei. 2018 October thla in paih hi CPC paih chimtu saya Tluang Lian sin ah ka rak cawng. Cu ka cawn mi cu Pathin nih a ka dawt caah ka zuamnak le ka tuahsernak ah thluachuah a pek i tubantuk in teinak ka hmuh hi a si. Hmailei ka dam ko ah cun paih um chung paoh ka pai peng rih ko lai” tiah Zophei paih Champion Salai Mang Thawng Lian nih TCP ah a chim.
“Hmailei Zophei paih an tuah than ah cun zatlang paih le zuamcawh paih zong hi um chih seh law ti ka duh. Cun paih hi mipi nih thazaang pe chinchin hna u sih. Kan nunphung pakhat a si caah paih hi cawng hna usih law hmailei ah cun Chin Miphun Ni hna ah Zophei club in dir kho hna u sih ti ka duh. Tutan paih laksawng an pekmi cu khuate dirhmun in cun a za tuk, nain minung pakhat tei ah mah zat tiin hmailei ah tangka pe kho hna seh law ti ka duh. Tutan kan Zophei aa paimi pawl ka zoh tik hna ah ka lung an tling ngai. Paih hi puai ngan ah cun voi 3 ka pai i voikhat Champion ka co. Minung tambik ka tei hi pa 4 an si. Tukum CND paih ah minung pathum ka tei hna. Ka dam ko ah cun zeibantuk zuamcawh paoh ka cohlan dih ko” tiah a chim chap.
Zophei paih champion Mang Thang Lian hi June thla in kum 20 a tling lai. A nu Pi Sui Thlia a pa Pu Bawi Hrin an si. Unau pa 5 lakah a hniangbik chang a si i Zeiphai khua mi Hakha ah khuasa mi a si. Sianginn hi taanghra auwn hnu ah Psychology major kai aa tim tiah kan theih.
Mang Thang Lian hi avoi 2nak CPC special zuamcawh ah Hakha paih thiam Van Ram Awr he zong an rak i pai bal. Tu lio a rian tuan lio mi cu CPC ah a si tiah kan theih.
About The Author
